Հարավային Կորեայի խորհրդարանն իմփիչմենթի է ենթարկել նախագահի պաշտոնակատարին

Հարավային Կորեայի խորհրդարանը քվեարկել է նախագահի պաշտոնակատար Հան Դոք Սուի իմփիչմենթի օգտին՝ երկու շաբաթ անց այն բանից հետո, երբ քվեարկել էր երկրի նախագահ Յուն Սուկ Յոլին իմփիչմենթի օգտին, գրում է BBC-ն։

Նշվում է, որ իմփիչմենթին կողմ է քվեարկել, ընդհանուր առմամբ, 192 օրենսդիր՝ անհրաժեշտ 151 ձայնի փոխարեն։

Վարչապետ Հանն այդ պաշտոնը ստանձնել էր այն բանից հետո, երբ նախագահ Յունին խորհրդարանի կողմից իմփիչմենթի էին ենթարկել դեկտեմբերի 3-ին ռազմական դրություն մտցնելու անհաջող փորձից հետո: Հանը պետք է երկիրը դուրս բերեր քաղաքական ցնցումներից, սակայն ընդդիմադիր պատգամավորները պնդում են, որ նա հրաժարվում է Յունի իմփիչմենթի գործընթացն ավարտին հասցնելու պահանջներից: Հաղորդվում է, որ խորհրդարանում քաոս է եղել քվեարկության ժամանակ։

Յունի և Հանի իշխող կուսակցության օրենսդիրները բողոքի ակցիա են անցկացրել այն բանից հետո, երբ Ազգային ժողովի խոսնակ Վու Վոնշիկը հայտարարել է, որ իմփիչմենթն ընդունելու համար անհրաժեշտ կլինի ընդամենը 151 ձայն:

Սա նշանակում էր, որ ի տարբերություն Յունի իմփիչմենթի համար պահանջվող 200 ձայնի՝ այս անգամ իշխող պատգամավորների ձայները չեն պահանջվի։

Իշխող կուսակցության պատգամավորները հայտարարել են, որ քվեարկությունն «անվավեր» է և «իշխանության չարաշահում» է տեղի ունենում՝ ի պատասխան կոչ անելով խոսնակին հեռանալ պաշտոնից։ Նրանցից շատերը բոյկոտել են քվեարկությունը։

Կորեայի Սահմանադրական դատարանը կազմված է ինը հոգուց։ Առնվազն վեց դատավոր պետք է հաստատի Յունի իմփիչմենթը, որպեսզի որոշումը հաստատվի:

Ներկայում ՍԴ-ն ընդամենը վեց դատավոր ունի, ինչը նշանակում է, որ մեկ մերժումը կփրկի Յունին հեռացվելուց:

Ֆինանսների նախարար Չոյ Սանգ-Մոկը պատրաստվում է փոխարինել Հանին նախագահի պաշտոնակատարի պաշտոնում։

Թարգմանությունը՝ Էմմա Չոբանյանի