Սիրիայում Թուրքիայի ու քրդական ուժերի միջև հրադադարը երկարաձգվել է

Թուրքիայի և ԱՄՆ-ի աջակցությունը վայելող սիրիական քրդական ուժերի (SDF) միջև հրադադարը Սիրիայի հյուսիսում գտնվող Մանբիջ քաղաքի շուրջ երկարաձգվել է մինչև այս շաբաթվա վերջ։ Այս մասին իր հերթական ճեպազրույցում հայտարարել է  ԱՄՆ Պետքարտուղարության խոսնակ Մեթյու Միլլերը, գրում է Reuters-ը։

Անցյալ շաբաթ Վաշինգտոնը միջնորդել էր նախնական զինադադար հաստատել այն բանից հետո, երբ ապստամբ խմբավորումները առաջ էին շարժվել դեպի Դամասկոս և տապալել Բաշար ալ-Ասադի ռեժիմը:

«Մենք շարունակում ենք համագործակցել SDF-ի հետ, Թուրքիայի հետ՝ առաջ գնալու ճանապարհի շուրջ», – ասել է Միլլերը՝ նշելով, որ ԱՄՆ-ը կցանկանար, որ հրադադարը երկարաձգվի որքան հնարավոր է երկար։

«Մենք չենք ուզում տեսնել, որ որևէ կողմ օգտվի ներկայիս անկայուն իրավիճակից՝ առաջ մղելու սեփական նեղ շահերը՝ ի հաշիվ ավելի լայն սիրիական ազգային շահերի»,-ասել է Պետդեպի խոսնակը։

SDF-ի հրամանատար Մազլում Աբդին էլ հայտնել է, խումբը պատրաստ է առաջարկ ներկայացնել հյուսիսային Քոբանի քաղաքում ապառազմականացված գոտու ստեղծման վերաբերյալ՝ անվտանգության ուժերի վերատեղակայմամբ՝ ԱՄՆ հսկողության և ներկայության ներքո: Նա նշել է, որ առաջարկը նպատակ ունի լուծելու Թուրքիայի անվտանգության մտահոգությունները և ապահովելու շարունակական կայունությունը տարածքում:

Ավելի վաղ քրդական ուժերը հայտարարել էին, որ Թուրքիայի կողմից աջակցվող ուժերը ձախողել են ԱՄՆ միջնորդությամբ հրադադարը։

Թարգմանությունը՝ Էմմա Չոբանյանի