Եվրախորհրդարանում կոչ են արել փակել ԵՄ տարածքում գործող բոլոր «Ռուսական տները»

Եվրոպական խորհրդարանի 71 պատգամավորներ կոչ են արել ԵՄ ղեկավարությանը միջոցներ ձեռնարկել միության երկրներում «Ռուսական տների» գործունեությունը դադարեցնելու ուղղությամբ։ Համապատասխան դիմումը խորհրդարանականներն ուղարկել են Եվրոպական խորհրդի նախագահ Անտոնիու Կոշտային, Եվրահանձնաժողովի նախագահ Ուրսուլա ֆոն դեր Լայենին և ԵՄ արտաքին քաղաքականության և անվտանգության հարցերով բարձր ներկայացուցիչ Կայա Կալլասին։

Նախաձեռնության հեղինակը Լիտվայից Եվրախորհրդարանի պատգամավոր Ռասա Յուկնյավիչենեն է, հայտնում է լիտվական LRT հեռուստառադիոընկերությունը, որին վկայակոչում է The Moscow Times-ը։

Փաստաթղթում նշվում է, որ «Ռուսական տները» շարունակում են գործել ԵՄ 15 երկրներում, այդ թվում՝ Բելգիայում, Գերմանիայում, Ֆրանսիայում, Ավստրիայում և Իսպանիայում։ Պատգամավորներն այդ կենտրոններն անվանել են «հիբրիդային ազդեցության» գործիքներ և «տեղեկատվության մանիպուլյացիայի նպատակով արտերկրում իրականացվող գործողությունների համակարգողներ»։

Եվրախորհրդարանում ընդգծել են, որ կենտրոնների գլխավոր կազմակերպությունը՝ «Ռոսսոտրուդնիչեստվո»-ն, գտնվում է ԵՄ պատժամիջոցների ներքո։ Միաժամանակ, մասնաճյուղերի փակումը պաշտոնապես շարունակում է մնալ ազգային իշխանությունների իրավասության շրջանակում։

Սեպտեմբերին Գերմանիան պաշտոնապես Ռուսաստանին մեղադրել էր Լայպցիգ/Հալլե օդանավակայանում դիվերսիա կազմակերպելու մեջ, որտեղ ուկրաինական ռազմատրանսպորտային ինքնաթիռի մոտ պայթուցիկով անօդաչու թռչող սարք էր հայտնաբերվել։ Դրանից հետո Գերմանիայի իշխանությունները հայտարարել էին Բոննում Ռուսաստանի գլխավոր հյուպատոսությունը և Բեռլինում «Ռուսական տունը» փակելու մասին։

Մոսկվան հերքել էր մեղադրանքները։ Ռուսաստանի արտաքին գործերի նախարար Սերգեյ Լավրովը հայտարարել էր, որ «Ռուսական տան» գործունեության դադարեցմանն ի պատասխան Ռուսաստանում կփակվեն Գյոթեի ինստիտուտի գերմանական մասնաճյուղերը։

Գերմանիայից բացի՝ Ուկրաինայում լայնածավալ պատերազմի սկսվելուց հետո ԵՄ ևս վեց երկրներում դադարեցվել է «Ռուսական տների» գործունեությունը, մասնավորապես, Սլովենիայում, Սլովակիայում, Խորվաթիայում, Հյուսիսային Մակեդոնիայում, Չեռնոգորիայում և Ռումինիայում։

Մշակութային կենտրոնների գործունեության դադարեցման պատճառը կա՛մ միջկառավարական համաձայնագրերի գործողության դադարեցումն է եղել, կա՛մ «Ռուսական տների» աշխատակիցների արտաքսումը։ Միևնույն ժամանակ, Ռուսաստանը նոր կենտրոններ է բացում Աֆրիկայի, Ասիայի և Լատինական Ամերիկայի երկրներում, ավելի վաղ հայտարարել էր «Ռոսսոտրուդնիչեստվո»-ի նախկին ղեկավար Եվգենի Պրիմակովը։

«Ռուսական տունը» «Ռոսսոտրուդնիչեստվո»-ի արտերկրյա ներկայացուցչությունների ոչ պաշտոնական անվանումն է։ Այն զբաղվում է «աշխարհում Ռուսաստանի հումանիտար ազդեցության ուժեղացմամբ»։ ԵՄ-ն գործակալության նկատմամբ պատժամիջոցներ է սահմանել 2022 թվականի հուլիսին։

Թարգմանությունը՝ Էմմա Չոբանյանի