08.10.2026 | 21:07
Միրզոյանն ու Արաղչին հեռախոսազրույց են ունեցել
Իսրայելը վերջին տարիների ամենաուժեղ հարվածներն է հասցրել Սիրիայի Տարտուսին, որը երկրաշարժ է առաջացրել․ ՏԵՍԱՆՅՈՒԹ
Քաղաքականություն
16.12.2024 | 11:24
Սիրիական պատերազմի դիտորդ կազմակերպությունը երկուշաբթի վաղ առավոտյան հայտարարել է, որ իսրայելական հարվածները թիրախավորել են Սիրիայի ափամերձ Տարտուս շրջանում գտնվող ռազմական օբյեկտները՝ դրանք անվանելով «ամենաուժեղ հարվածներն» այդ տարածքում վերջին ավելի քան մեկ տասնամյակի ընթացքում, գրում է Al Arabiya-ն՝ վկայակոչելով AFP-ին։
«Իսրայելական ռազմական ինքնաթիռները հարվածներ են հասցրել՝ թիրախավորելով մի շարք օբյեկտներ, ներառյալ՝ հակաօդային պաշտպանության ստորաբաժանումները և «երկիր-երկիր» հրթիռների պահեստները»,- հայտնել է Մարդու իրավունքների սիրիական դիտորդական կենտրոնը՝ հավելելով, որ դրանք «ամենածանր հարվածներն են Սիրիայի ափամերձ շրջանում 2012 թվականի հարվածների մեկնարկից ի վեր»:
Սոցցանցերում հրապարակված կադրերում արձանագրվել է հզոր պայթյունը:
Հաղորդվում է, որ հարվածները երկրաշարժ են առաջացրել, ցնցումներն արձանագրվել են երկրաշարժի մոնիթորինգի միջոցով։ The Times of Israel-ը գրում է, որ Իսրայելի սեյսմոլոգիական բաժանմունքի աշխարհագրական հետազոտությունը 3,1 մագնիտուդով ցնցում է հաղորդել տեղական ժամանակով 23:49-ին, որի էպիկենտրոնը գտնվել է Բանիաս քաղաքի ափից մոտ 28 կիլոմետր (17 մղոն) հեռավորության վրա:
Լրատվամիջոցը նշում է, որ երկրաշարժի խորությունը չափվել է 32 կիլոմետր (20 մղոն), և ոչ մի հաստատում չկա, որ ցուցմունքն իրականում առաջացել է պայթյունների հետևանքով:
Թարգմանությունը՝ Էմմա Չոբանյանի
