Մոսկվան անվտանգ ապաստան է ապահովել Ասադի համար․ ՌԴ ԱԳ փոխնախարարը՝ Սիրիայի նախկին նախագահին Հաագայի դատարանին հանձնելու մասին

Ռուսաստանն ապաստան է տրամադրել Սիրիայի նախկին նախագահ Բաշար Ասադին՝ վարչակարգի փլուզումից հետո նրան տեղափոխելով «ամենաապահով կերպով»։ Այս մասին NBC News-ին տված հարցազրույցում ասել է ՌԴ փոխարտգործնախարար Սերգեյ Ռյաբկովը։

«Նա ապահով է, և դա ցույց է տալիս, որ Ռուսաստանը գործում է այնպես, ինչպես պահանջվում է նման արտակարգ իրավիճակում։ Ես պատկերացում չունեմ, թե ինչ է կատարվում նրա հետ այս պահին»,- նշել է նա։

Ռյաբկովն ասել է, որ Ռուսաստանը կշարունակի աջակցել Սիրիայի առաջնորդին, որի ռեժիմը իրավապաշտպան կազմակերպությունների, նախկին կալանավորների կողմից մեղադրվում է քիմիական զենքով, ռումբերով հարձակումների և պատերազմական այլ հանցագործությունների, ինչպես նաև տասնյակ հազարավոր մարդկանց սպանությունների, համակարգված խոշտանգումների և բռնի անհետացման մեջ 2011 թվականի զանգվածային ապստամբությունից ի վեր:

«Ռուսաստանը Կանոնադրության մասնակից չէ, որը ստեղծել է Միջազգային քրեական դատարանը»,- ասել է Ռյաբկովը՝ պատասխանելով հարցին՝ արդյո՞ք Կրեմլը կհանձնի Ասադին միջազգային դատավարության:

Ռյաբկովը նշել է, որ Ասադը «մեղադրվում է երկրների և կառավարությունների նույն խմբի կողմից, որոնք մշտապես ճնշում են իրենց ուզած ձևով ապրելու փորձերը, ինչպես դա եղավ Իրաքում, Լիբիայում և շատ այլ երկրներում», նա հավելել, թե ԱՄՆ-ը «կազմաձևում է իր արձագանքը»՝ կախված նրանից, թե ում է հետապնդում դատարանը։

Ըստ ռուսաստանցի պաշտոնյայի՝ ով էլ հայտնվի Սիրիայում իշխանության ղեկին, լինի դա «Հայաթ Թահրիր ալ-Շամ» (HTS) զինյալ խմբավորումը, որը գլխավորել է  ապստամբ ուժերը, թե մեկ ուրիշը, Ռուսաստանը «վճռականորեն և հաստատակամորեն» հավատում է, որ Սիրիան «պետք է լինի ինքնիշխան, միասնական և ամբողջական»։

«Մենք հուսով ենք, որ այնտեղ չենք ունենա այնպիսի իրավիճակ, որը կնշանակի, որ Սիրիայի մասերը բաժանված են միմյանցից», – հավելել է նա։

ՌԴ ԱԳ փոխնախարարը նաև նշել է, որ միակ բանը, որ Ռուսաստանը կիսում է ԱՄՆ-ի հետ, Սիրիայում «Իսլամական պետություն» ահաբեկչական խմբավորման վերածննդի հնարավորության վերաբերյալ մտահոգությունն է։

Թարգմանությունը՝ Էմմա Չոբանյանի