Չեմ կարող ասել` տեսագրությունն ինչպես ու ինչու էր հայտնվել լրատվամիջոցում. Արմեն Խաչատրյան․ ՏԵՍԱՆՅՈՒԹ

ԱԺ-ում սեպտեմբերի 6-ին տեղի ունեցած միջադեպից հետո իրավիճակը լարված էր նաև միջանցքում։ Տեսախցիկների տեսագրությունը տարածել էր իշխանական Civic.am-ը և գրել․ «Ինչպե՞ս են «Ուժեղ Հայաստանի» ախրանիկ-օգնականները փորձում ներխուժել ԱԺ նիստերի դահլիճ»։

ՔՊ խմբակցության պատգամավոր Արմեն Խաչատրյանը Factor TV-ի հարցին ի պատասխան ասաց, որ չունի հարցի պատասխանը՝ թե ինչպես ու ինչու էր դա հայտնվել իշխանական լրատվամիջոցում։

«Հնարավոր է, որ առաջիկայում պարզաբանում տանք էդ հարցի վերաբերյալ։ Եթե դա հուզող հարց է, մենք անպայման պարզաբանում կտանք»,- ասաց Խաչատրյանը։

Հարցին՝ արդյոք նորմա՞լ է համարում, որ ԱԺ տարածքի տեսագրությունը կարող է հայտնվել որևէ լրատվամիջոցում, պատգամավորը պատասխանեց, որ նախ պետք է ուսումնասիրի ԱԺ կանոնադրությունն ու համապատասխան կարգավորումները։

«Պետք է կանոնադրությունը նայեմ, տեսնեմ՝ ինչպիսինն են կարգավորումները։ Եթե քրեական գործի նյութ չէ, եթե որևէ անհատական տվյալներ չի պարունակում, և եթե ինչ-որ մի լրատվամիջոց հարցում է անում և ուզում է այդ տեսանյութը, հնարավոր է իրավիճակ, որ էդ լրատվամիջոցին պետք է տալ տեսանյութը։ Սա ասում եմ ենթադրաբար․ պետք է ուսումնասիրեմ կանոնադրությունը, հասկանանք՝ երբ են տալիս, ինչ պայմաններում են տալիս և որ տեսանյութը կարող են տալ, որը՝ չէ»,- ասաց նա։

Սեպտեմբերի 6-ին իրավիճակը նիստերի դահլիճում լարվել էր, երբ ԱԺ նախագահ Ռուբեն Ռուբինյանը անջատել էր «Ուժեղ Հայաստան» խմբակցության պատգամավոր Էդգար Ղազարյանի խոսափողը՝ նշելով, որ նա օրակարգից չի խոսում։

Դրանից հետո դահլիճում հնչել էին գոռգոռոցներ, պատգամավորների միջև սկսվել էր հրմշտոց ու քաշքշուկ։

Ռուբեն Ռուբինյանը ընդմիջում էր հայտարարել և նիստերի դահլիճ հրավիրել անվտանգության աշխատակիցներին։ 

Միջադեպից հետո Ռուբինյանը հայտարարել էր, որ «Ուժեղ Հայաստանի» պատգամավորների օգնականները փորձել են մուտք գործել ԱԺ նիստերի դահլիճ, և այդ հանգամանքը քննության առարկա կդառնա։

ԱԺ-ից հայտնել են, որ «Ուժեղ Հայաստանի» պատգամավորների 6 օգնականի արգելվել է մուտք գործել ԱԺ տարածք։ Նրանց նկատմամբ կարգապահական վարույթ է նախաձեռնվել՝ նիստերի դահլիճ ներխուժելու փորձերի, ինչպես նաև ԱԺ տարածքում անկարգություններ հրահրելու դեպքերի առնչությամբ։

Մանրամասները՝ տեսանյութում։

Արփի Հակոբյան