30.04.2026 | 18:30
Հնդկաստանն ու Հայաստանը ռազմական տեխնիկայի համատեղ մշակում են սկսել. The Indian Express
Վրաստանի ՆԳՆ-ն քրեական գործեր է հարուցել բողոքի ցույցերի ժամանակ ձերբակալված 15 անձանց դեմ
Քաղաքականություն
05.12.2024 | 18:49
Վրաստանի ՆԳՆ-ն քրեական գործեր է հարուցել ԵՄ-ին անդամակցելու բանակցությունների դադարեցման դեմ բողոքի ցույցերի ժամանակ ձերբակալված 15 անձանց դեմ։ Այս մասին ասվում է գերատեսչության կայքում հրապարակված հաղորդագրությունում։
7 մարդ բերման է ենթարկվել գույքը վնասելու կամ ոչնչացնելու, ոստիկանության աշխատակիցների նկատմամբ սպառնալիքներ կամ բռնություն գործադրելու կասկածանքով, ևս 7-ը՝ խմբակային բռնություն կազմակերպելու և բռնի գործողությունների հրապարակային կոչերի կասկածանքով։ Մեկ անձ բերման է ենթարկվել պայթյուն նախապատրաստելու կասկածանքով։
Ձերբակալվածներից մեկը 18-ամյա պատանի է։ ՆԳՆ-ն պնդում է, որ նոյեմբերի 30-ին հանրահավաքի ժամանակ նա գտնվել է Ռուսթավելի պողոտայում և դանակով հարձակվել է ոստիկանի վրա։
Վրաստանում բողոքի ակցիաներ են ընթանում նոյեմբերի 28-ից։ Դրանք վերսկսվել են այն բանից հետո, երբ վարչապետ Իրակլի Կոբախիձեն հայտարարեց ԵՄ-ին անդամակցելու բանակցությունները մինչև 2028 թվականը դադարեցնելու մասին: «Էխո Կավկազա»-ի տվյալներով՝ այս օրերի ընթացքում անվտանգության ուժերը վարչական իրավախախտումների՝ խուլիգանության և օրենքի պահանջներին չենթարկվելու մեղադրանքով բերման են ենթարկել մոտ 300 անձի։ Բերման են ենթարկվել նաև ընդդիմության մի շարք առաջնորդներ։
Թարգմանությունը՝ Տաթև Ֆռանգյանի
