Հայ հանդիսատեսը երես է թեքել հայկական ֆիլմերից, մոդայի հետևից գնալն ազնիվ չէ. Ջիվան Ավետիսյան. ՏԵՍԱՆՅՈՒԹ

«Հայաստանում մրցունակ կինոարտադրություն ունենալու համար հայկական կինեմատոգրաֆը պետք է պետության կողմից ուշադրության ներքո լինի, հանդիսատեսն էլ պետք է այցելի կինթատրոններ, դիտի հայկական ֆիլմեր, այլապես հայ հանդիսատեսը երես է թեքել հայկական ֆիլմերից, մինչդեռ սկզբունքի հարց է հայկական ֆիլմեր դիտելը և այդ կերպ դրանց առաջխաղացմանը նպաստելը, ինչո՞ւ դա չանել ու տուրք տալ արտասահմանյան ֆիլմերի մոդային, գովազդին.ազնիվ չէ»,- Factor TV-ի հետ զրույցում տեսակետ է հայտնում կինոռեժիսոր Ջիվան Ավետիսյանը:

Նրա համոզմամբ` հայ կինոն այսօր առաջխաղացում ունի հիմնականում անհատ կինոգործիչների ջանքերի շնորհիվ. «Լավ կինեմատոգրաֆ ունենալու համար մեզ մեծ երազողներ են պետք, բայց դու չես կարող եվրոպացի կինոգործիչների հետ համարտադրությամբ ստեղծել կինո, եթե չունես պետության աջակցությունը»:

Ջիվան Ավետիսյանը խոսում է նաև օրենսդրական բացերի մասին և տեսակետ հայտնում, որ «Հարկերի վերադարձի մասին» օրենքը, որը մշակման փուլում է, կարող է մեծապես աջակցել ոլորտին. «Հուսամ` այն շուտով կգործարկվի և մեծապես կխթանի տեղացի արտադրողի աշխատանքին»:

Ռեժիսորը Բեռլինի, Կաննի, Վենետիկի և այլ փառատոններին կից կինոշուկաներում ներկայացնում է Արցախի և, առհասարակ, հայության համար կարևոր հարցեր. «Եռանդուն կերպով աշխատում ենք կինոշուկայում առաջ մղել Արցախի թեման, մեկենասները, պետությունը պետք է գնահատեն դա, աջակցեն»:

Մանրամասները`տեսանյութում:
Աննա Բաբաջանյան