30.11.2024 | 19:32
Սիրիական բանակը որոշ հատվածներում նահանջում է առանց դիմադրության
Արարատի մարզում գործող 36 ամբուլատորիա կվերակազմակերպվի՝ ձևավորելով 12 առողջության կենտրոն
30.11.2024 | 14:20
Հայաստանի կառավարությունը նախատեսում է Արարատի մարզում գործող 36 ամբուլատորիա վերակազմակերպել՝ ձևավորելով 12 առողջության կենտրոն․ նախագիծը հրապարակվել է «e-draft» իրավական ակտերի կայքում։ Վերակազմակերպման նպատակն է բարելավել առողջապահական ծառայությունների որակը և մեծացնել կառավարման արդյունավետությունը։
Նախագծի համաձայն՝ ամբուլատորիաների միաձուլման և միացման միջոցով կստեղծվեն խոշոր բժշկական կենտրոններ, որոնք կապահովեն բնակչությանը որակյալ և հասանելի բժշկական ծառայություններով։ Հեռավոր գյուղերում գործող կենտրոնների միավորումը կնպաստի դեղորայքի մատակարարման, լաբորատոր հետազոտությունների կազմակերպման և բժշկական անձնակազմի կառավարման գործընթացների արդյունավետության բարձրացմանը։
Նախագծի ընդունման արդյունքում՝ բնակչությունը կշարունակի ստանալ բժշկական ծառայություններ իրենց բնակավայրերում՝ ապահովելով հասանելիություն, բժշկական ծառայությունների որակը և արդյունավետությունը կբարձրանան, վարչական ծախսերը կկրճատվեն, ինչը կբարելավի կառավարման արդյունավետությունը։
Վերակազմակերպման գործընթացը ֆինանսավորվելու է ամբուլատորիաների սեփական միջոցներից՝ առանց պետական բյուջեի լրացուցիչ բեռի։
Նախագիծը մշակվել է Արարատի մարզպետարանի աշխատակազմի կողմից։
Published by Armenpress, original at https://armenpress.am/hy/article/1206351
