Քաղաքականություն
29.11.2024 | 11:58
Վրաստանի արտաքին գործերի նախարարության մինչև 45 աշխատակիցներ համատեղ հայտարարություն են տարածել՝ դեմ արտահայտվելով Եվրամիությանը երկրի անդամակցությունը սառեցնելու՝ կառավարության որոշմանը։
«Վրացական դիվանագիտությունը երկար տարիներ գործադրել է բոլոր ջանքերը՝ Վրաստանը միացնելու եվրոպական և եվրատլանտյան կառույցներին, ինչը վրաց ժողովրդի կամքն ու պատմական ընտրությունն է։ Այսօրվա հայտարարությունը՝ ԵՄ-ին անդամակցության բանակցությունների օրակարգից Վրաստանի դուրս գալու մասին մինչև 2028 թվականը, չի համապատասխանում երկրի ռազմավարական շահերին»,- ասվում է հայտարարության մեջ։
Ըստ հայտարարության հեղինակների՝ որոշումը հակասում է Վրաստանի Սահմանադրության 78-րդ հոդվածի պահանջներին, որը սահմանում է երկրի կուրսը ԵՄ-ին և ՆԱՏՕ-ին միանալու ուղղությամբ։
Նրանք նշում են, որ ԵՄ ընդլայնման ներկայիս ալիքը պայմանավորված է միջազգային քաղաքական զարգացումներով և «պատմական աննախադեպ հնարավորություն է Վրաստանի համար»։ Դիվանագետները զգուշացնում են, որ նման հնարավորությունից երկրի հրաժարումը «կհանգեցնի բացասական ռազմավարական հետևանքների»։
«Բացի այդ, անդամակցության բանակցային գործընթացի հետաձգումը կհանգեցնի երկրի մեկուսացմանը։ Առանց արևմտյան գործընկերների աջակցության՝ Վրաստանը մենակ է մնում սպառնալիքների դեմ, որոնք հատկապես ուժեղանում են միջազգային և անվտանգության միջավայրում ընթացող գործընթացների ֆոնին»,- ասվում է հայտարարության մեջ։
Հայտարարությունը ստորագրել են Վրաստանի ԱԳՆ տարբեր վարչությունների ղեկավարներ և արտերկրում ծառայող դիվանագետներ։
Թարգմանությունը՝ Էմմա Չոբանյանի
