28.11.2024 | 23:27
Վրաստանում ցուցարարները շարժվում են դեպի խորհրդարան
Վրաստանում ցուցարարները շարժվում են դեպի խորհրդարան
Քաղաքականություն
28.11.2024 | 23:27
Թբիլիսիի Գորգասլիի փողոցում գտնվող «Վրացական երազանք»-ի կենտրոնական գրասենյակից ցույցի մասնակիցները երթով շարժվում են դեպի Ռուսթավելիի պողոտա, որտեղ կմիանան խորհրդարանի դիմաց հավաքված ցուցարարներին։
«Ալիք Մեդիա»-ի փոխանցմամբ՝ ցույցի մասնակիցներն ասում են՝ իրենք մինչև վերջ պայքարելու են Վրաստանի եվրոպական ապագայի համար։
Ըստ աղբյուրի՝ Ռուսթավելիի պողոտայում, որտեղ ևս բողոքի ցույց է, ցուցարարները հարվածում են խորհրդարանը շրջափակած երկաթե պատնեշին: Օրենսդիր մարմնի շենքի մոտ հավաքված ցույցի մասնակիցներն այսկերպ իրենց բողոքն են արտահայտում: Ռուսթավելիի պողոտան փակ է:
Թբիլիսիում և մի շարք քաղաքներում քաղաքացիները բողոքում են «Վրացական երազանք»-ի որոշման դեմ, ըստ որի՝ Վրաստանի չլեգիտիմացված կառավարությունը հրաժարվում է Եվրամիության հետ բանակցություններ սկսել մինչև 2028 թվականի ավարտը:
Նախագահ Սալոմե Զուրաբիշվիլիի խոսքով՝ այսօր ոչ լեգիտիմ իշխանությունը պատերազմ է հայտարարել սեփական ժողովրդին։
Ընդդիմության գնահատմամբ՝ կառավարությունը պաշտոնապես փոխել է երկրի արևմտյան ուղին։ ՀԿ-ները քաղաքացիներին կոչ են անում չհամաձայնել «Վրացական երազանք»-ի որոշման հետ:
