17.12.2025 | 11:33
Տեր Շտեգենը վերադարձել է խաղադաշտ ու մասնակցել «Բարսելոնայի» հաղթանակին․ ՏԵՍԱՆՅՈՒԹ
Oրհներգի փաշինյանական «ստանդարտը». որքանո՞վ է հիմնավորված գործադիրի ղեկավարի ցանկությունը. ՏԵՍԱՆՅՈՒԹ
Քաղաքականություն
28.11.2024 | 21:17
Փաշինյանի մասնակցությամբ բոլոր միջոցառումներին ՀՀ օրհներգը հնչելու է կենդանի կատարմամբ։ Կառավարության այսօրվա նիստում գործադիրի ղեկավարը հայտարարեց՝ բավական երկար ժամանակ է, ինչ տվել է այդ հանձնարարականը։
«Իմ վարչապետության ընթացքում մինչև X պահը պաշտոնական միջոցառումների ժամանակ, երբ հիմնը հնչում է, ես ուշադիր եմ, և շատ երկար ժամանակ ես չեմ հանդիպել ՀՀ օրհներքի նույն ձևի կատարման, չկա արագության տեմպի ստանդարտ, հնչողության ստանդարտ»,- ասաց վարչապետը։
Փաշինյանն ազատ ժամանակ շատ ունի․ Կառավարության նիստից նման տպավորություն է ստացել Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը։
«Բոլոր թեմաները պատշաճ քննարկվել, լուծվել են, հիմա էլ հասել ենք էնտեղ, որ իր ներկայությամբ միջոցառումների ժամանակ օրհներգը պիտի կենդանի կատարմամբ լինի»,- ասաց Բարսեղյանը։
Երգչուհի, երգահան Լիլիթ Բլեյանի համար առնվազն անհասկանալի է որոշումը, գործադիրի ղեկավարին երգչուհին առաջարկ ունի։
Նիկոլ Փաշինյանը մտահոգ է․ որևէ միջոցառման կազմակերպման ընթացքում, ըստ նրա, ջրին, գինուն, բաստուրմային, սուջուխին ավելի մեծ նշանակություն ենք տալիս և ուշադրություն դարձնում, քան օրհներգին։
«Յութուբում 1000 հատ օրհներգ կա, մտնում գրում ես ՀՀ օրհներգ «Enter» ես տալիս և օրհներգը հնչում է։ Եվ իմ անձնական փորձը այն է եղել, որ երբեք որևէ մեկը իրեն հարց չի տվել՝ լսեք, բա ի՞նչ օրհներգ է հնչելու, ո՞նց է հնչելու։ Սա մի ֆունդամենտալ խնդիր, որը, որը այս նախագծով մենք պիտի լուծենք»,- ընդգծեց Փաշինյանը։
Հենց այդ ֆունդամենտալ խնդիրը լուծելու համար է գործադիրի ղեկավարը որոշել, որ օրհներգը կհնչի որոշակի որակական ստանդարտին համապատասխան՝ իր ներկայությամբ կենդանի կատարմամբ։
«Կարելի է նույնիսկ փորձել այդ օրհներգի կատարման ժամանակ տեքստի և երաժշտության հեղինակների ոգին կանչել, գերեզմաններից հանել, բերել էդ մարդկանց, որ ավելի պաշաճ լինի»,- հեգնեց Լևոն Բարսեղյանը։
Լիլիթ Բլեյանի կարծիքով՝ կառավարության անդամների քննարկման թեման այլ պիտի լիներ։
«Մարդը, որը խոսում է ձայնագրության որակից, որակապես պիտի համապատասխանի այն պաշտոնին, որը զբաղեցնում է»։
Հակակոռուպցիոն կոմիտեի ստեղծման 3 ամյակի կապակցությամբ, երբ Փաշինյանն այցելել էր կոմիտե, օրհներգն արդեն իսկ կենդանի կատարարմամբ էր հնչում։ Ընդ որում՝ արդեն իսկ խմբագրված տարբերակով, որտեղ օրհներգի առաջին քառատողից հետո երգչախումբն անցում է կատարում վերջին՝ չորրորդ քառատողին, որից հետո կատարում են երկրորդ քառատողը և ավարտում երրորդով։ Գործադիրը միայն այսօր հավանության արժանացրեց իշխանական պատգամավորների հեղինակած այս նախագիծը և այն դեռ ԱԺ-ում պետք է քվեարկության դրվի։ Ստացվում է՝ Նիկոլ Փաշինյանը խախտում է ՀՀ օրհներգի կատարման դեռևս գործող կարգը, որն առաջացնում է պատասխանատվություն օրենքով սահմանված կարգով։ Այս մասին այսօր խոստովանեց նաև ինքը։
Factor TV-ին հայտնի դարձավ՝ օրհներգը կատարել է Երևանի պետական կամերային երգչախումբը։ Ղեկավար Եվա Խաչատրյանը Factor TV-ի հետ զրույցում ասաց՝ դեռ անցյալ տարվանից է երգչախումբն օրհներգը կատարում միջոցառումների ժամանակ, մի անգամ Կառավարությունն է հրավիրել, մյուս դեպքում՝ նախարարություններն ու վարչությունները։ Որքա՞ն արժե օրհներգի երգչախմբային մեկ կատարումը․ Խաչատրյանն ասաց՝ տեղյակ չէ, հաշվապահությանն առնչվող հարցերին չի խառնվում:
Վարչապետի աշխատակազմի տեղեկատվության և հասարակայնության հետ կապերի վարչության պետ Արմեն Խաչատրյանից Factor TV-ն հետաքրքրվեց՝ գրավո՞ր, թե՞ բանավոր է եղել Փաշինյանի հանձնանարականը, երգախմբի մեկ կատարումն ի՞նչ ծախս է ենթադրում․ Խաչատրյանը հորդորեց դիմել գրավոր։
Մանրամասները՝ տեսանյութում։
Արփի Հակոբյան
