30.04.2026 | 22:58
«Նուբարաշեն-Արին-Բերդ» ջրատարի վթարման հետևանքով Երևանի և Արարատի մարզի մի շարք հասցեներում 21 ժամ ջուր չի լինի
ՌԴ-ն սկսել է նախապատրաստվել Զապորոժիեն գրավելուն. The Economist
Քաղաքականություն
25.11.2024 | 15:09
Ռուսաստանը պատրաստվում է «համարձակ» հարձակման Զապորոժիե քաղաքի վրա, որը գտնվում է ճակատից 30 կմ հեռավորության վրա, The Economist-ին հայտնել են Ուկրաինայի հետախուզության աշխատակիցները։ Նրանց տվյալներով՝ գործողության մեկնարկի ստույգ ժամկետները հայտնի չեն, սակայն սպասվում է, որ ռուսական բանակը դրանում կներգրավի մինչև 130 հազար զինվորականի։
Զապորոժիեի գրավումը չափազանց կարևոր է Ռուսաստանի նախագահ Վլադիմիր Պուտինի համար։ 2022 թվականի սեպտեմբերին նա հայտարարել էր ամբողջ Զապորոժիեի շրջանի բռնակցման մասին, չնայած ռուսական բանակն այն ժամանակ վերահսկում էր շրջանի միայն մեկ երրորդը, նշում է The Economist-ը։
Միևնույն ժամանակ, Զապորոժիեն ռազմավարական նշանակություն ունի Ուկրաինայի համար։ Սա երկրի ծանր արդյունաբերության երեք մնացած կենտրոններից մեկն է, որը չափազանց կարևոր է Ուկրաինայի՝ որպես պետություն գոյատևելու համար, գրում է պարբերականը։
Մինչ Զապորոժիեի վրա հարձակման հնարավոր սկիզբը՝ Ռուսաստանը զանգվածաբար հրետակոծում է քաղաքը։ Վերջին երկու ամսվա ընթացքում ռուսական հրթիռներն ու ռումբերը Զապորոժիեում ավերել են 1500 տուն: Առաջնագիծը նույնպես կենդանացել է՝ անընդհատ լսվում են պայթյունների ձայներ։
Որոշ ուկրաինացի զինվորականներ, սակայն, կարծում են, որ Ռուսաստանը դեռևս չի կարող հարձակման անցնել Զապորոժիեի մերձակայքում: Քաղաքի վրա հարձակման առաջին փուլում նախատեսվում էր օգտագործել երկու դիվիզիա (20-30 հազար զինվոր), սակայն նրանց կեսին ստիպված են եղել ուղարկել Կուրսկ՝ փորձելու դուրս մղել ուկրաինական բանակին այստեղ գրավված դիրքերից, նշել է գնդապետ Ալեքսեյ Խիլչենկոն։
Թարգմանությունը՝ Տաթև Ֆռանգյանի
