10.12.2025 | 23:29
ԱՄՆ Կոնգրես է ներկայացվել 907 ուղղումն ամբողջությամբ չեղյալ համարելու մասին օրինագիծ
Հայաստանի բասկետբոլի ընտրանու մարզչի ժամանակավոր պաշտոնակատարը ֆավորիտ է համարում Ավստրիային
22.11.2024 | 17:03
Հայաստանի բասկետբոլի հավաքականի գլխավոր մարզչի ժամանակավոր պաշտոնակատար Գեորգի Ղազանչյանն աշխարհի առաջնության նախընտրական փուլում Ավստրիայի դեմ առաջիկա խաղում ֆավորիտ համարում է մրցակից թիմին:
«Միանշանակ առաջիկա խաղի ֆավորիտն Ավստրիան է: Ավստրիան հավաքված խաղ է ցուցադրում։ Նրանք միասին խաղալու երկար տարիների փորձ ունեն, փոխարինողների երկար նստարան ունեն: Սակայն մենք էլ մեր ուժեղ կողմերն ունենք»,-«Արմենպրես»-ի հաղորդմամբ` լրագրողների հետ զրույցում ասաց Ղազանչյանը:
Վերջինիս խոսքով` Հայաստանի հավաքականը պետք է հիմնականում գործի պաշտպանությունում:
«Հարձակման գծում մենք, որպես այդպիսին, խնդիրներ չունենք, քանի որ մեր խաղացողներից շատերը կարող են կազմակերպել հարձակումն ու եզրափակել այն: Շեշտը պետք է դնենք պաշտպանության վրա»,-առանձնացրեց նա:
Հայաստանի բասկետբոլի հավաքականի անդամ Ալբերտ Թադևոսյանի կարծիքով՝ ազգային թիմը նորմալ նախապատրաստական շրջան է անցել:
«Այո, ֆավորիտը Ավստրիան է, և մենք պետք է ամբողջ ներուժով գործենք, անթերի կատարենք բոլոր նետումները»,-ասաց նա:
Նոյեմբերի 24-ին Հայաստանի ազգային հավաքականը Երևանում կհյուրընկալի Ավստրիայի ընտրանուն: Այս հանդիպումը կարևոր նշանակություն ունի թիմի համար առաջնության հաջորդ փուլում պայքարը շարունակելու համար: Խաղը կմեկնարկի Երևանի ժամանակով 18:00-ին:
