«Հայերը կարող են վերադառնալ Ղարաբաղ միայն Ադրբեջանի քաղաքացիություն ընդունելով»․ Հաջիև

Ադրբեջանի նախագահի արտաքին քաղաքականության հարցերով  օգնական Հիքմեթ Հաջիևը պատասխանել է ամերիկացի սենատոր Էդ Մարքիի ելույթներին COP29-ին մասնակցելուց և Բաքվից վերադառնալուց հետո։

Ադրբեջանական «Թուրան»-ը գրում է, որ Հաջիևը X-ի իր էջում նշել է, թե  սենատորն իր այցի արդյունքները ներկայացրել է «այնպես, որ համապատասխանում է նրան, ինչը հայկական լոբբին ուզում է լսել»։

Նա ներկայացրել է Մարքիի հետ հանդիպման բովանդակությունը և Բաքվի պահանջները ամերիկացի օրենսդիրների նկատմամբ։ Դրանց թվում են՝ «ԱՄՆ Կոնգրեսի 907-րդ փոփոխությունը և Ադրբեջանի դեմ Հայաստանի ռազմական ագրեսիայի 30-ամյա աջակցությունը»։

Հաջիևը, արդարացնելով Բաքվի անօրինական գործողությունները, նշել  է, թե ԼՂ-ի «այդ թվում՝ օլիգարխ Ռուբեն Վարդանյանի հանցագործությունների հետաքննությունը կհասցվի իրենց տրամաբանական ավարտին, և նրանք կկանգնեն  դատարանի առաջ»։

Նա, անտեսելով ԼՂ հայերի վերադարձին չխոչընդոտելու  ՄԱԿ-ի Արադարադատության դատարանի որոշումը,  ասել է, թե «Ղարաբաղի հայերը քաղաքացիություն ստանալու համար կարող են դիմել «միայն անհատական ​​հիմունքներով», և նրանց վերադարձը կքննարկվի Ադրբեջանի օրենքներին համապատասխան։

«Սակայն դա կարող է տեղի ունենալ միայն փոխադարձ հիմունքներով և Հայաստանից «վտարված ադրբեջանական բնիկ բնակչության» վերադարձի իրավունքի ճանաչմանը զուգահեռ»,- նշել է Հաջիևը ՝ամերիկացի օրենսդիրներին կոչ է անելով չլինել «հայկական լոբբիի գործիքները», որոնք խոչընդոտում են Հայաստանի հետ խաղաղությանը։

Խոսելով Բաքու կոնգրեսական Ֆրենկ Փալոնի այցի ու դրա դեմ կազմակերպված արշավի մասին՝ դա անվանել է «Աստվածային հատուցում այն ​​անարդարության համար, որը նա իրականացրել է  երկար տարիներ ադրբեջանական ժողովրդի նկատմամբ»։

Հիշեցնենք, որ ԱՄՆ դեմոկրատ սենատորներ Շելդոն Ուայթհաուսն ու Էդ Մարքին Բաքվում COP29-ի շրջանակում ասուլիսի ժամանակ հայտարարել էին, որ աջակցում են Հայաստանին ու ընդգծել, որ ԼՂ-ի հայերը պետք է ունենա վերադարձի իրավունք։

Ֆրենկ Փալոնն  էլ Բաքվից վերադառնալուց հետո հայտարարել էր, որ  իր դեմ արշավ ու հարձակումներ էին կազմակերպել Ադրբեջանի իշխանությունները։ Նա նշել էր, որ եթե ԱՄՆ դեսպանատան կողմից ապահովված անվտանգության միջոցները չլինեին, կհայտնվեր հիվանդանոցում։

Էմմա Չոբանյան