14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
«Հըզբոլլահ»-ի մոտ հայտնաբերված զենքի կեսից ավելին ռուսական է․ WSJ
Քաղաքականություն
19.11.2024 | 17:45
Իսրայելական բանակի կողմից հարավային Լիբանանում իրականացրած ռազմական գործողության ընթացքում «Հըզբոլլահ» խմբավորման մոտ հայտնաբերված զենքի 60-70%-ը ռուսական արտադրության է, The Wall Street Journal-ին (WSJ) հայտնել են իսրայելցի զինվորական պաշտոնյաները:
Նրանց խոսքով՝ իրենք հստակ չգիտեն, թե ինչպես է խմբավորումը ձեռք բերել այդ զենքերը, և ով է մարզել «Հըզբոլլահ»-ի զինյալներին՝ դրանք օգտագործելու համար, սակայն որոշ նմուշների գծանշումների համաձայն՝ զենքը հարավային Լիբանան է մտել Սիրիայից։ Հրթիռներից մեկի վրա ռուսերեն պիտակ է եղել, որի վրա՝ գրություն, որ հրթիռը փոխանցվել է Սիրիայի Պաշտպանության նախարարությանը:
Ըստ Իսրայելի պաշտպանության բանակի փորձագետները՝ ռուսական զինատեսակների մի մասը, որը հայտնվել է «Հըզբոլլահ»-ի տիրապետության տակ, արտադրվել է 2020 թվականին և վերջին տարիներին է ուղարկվել հարավային Լիբանան։ Մյուս օրինակները շատ ավելի հին են թվացել և ունեցել են նշումներ, որոնք ցույց են տալիս, որ դրանք արտադրվել են դեռևս 1980-ականներին:
«Հըզբոլլահ»-ի ձեռքում գտնվող ժամանակակից ռուսական զինատեսակների շարքում հայտնաբերվել են «Կորնետ» հակատանկային հրթիռներ, ինչպես նաև «Մետիս», «Կոնկուրս», «Ֆագոտ» և «Մալյուտկա» փոքր հեռահարության հրթիռներ։
«Կորնետի» նման կարճ հեռահարության հրթիռներ ունենալը չափազանց կարևոր է «Հըզբոլլահ»-ի համար, ինչը թույլ է տալիս նրան ավելի արդյունավետ արշավ սկսել Իսրայելի դեմ, քան կարող է անել ՀԱՄԱՍ-ը Գազայի հատվածում, նշել է Լոնդոնի Ռազմավարական հետազոտությունների միջազգային ինստիտուտի ռազմական հետազոտող Ֆաբիան Հինցը:
Թարգմանությունը՝ Տաթև Ֆռանգյանի
