31.10.2024 | 18:16
Բայրամովը Բրիտանիայի պետնախարարի հետ հայ-ադրբեջանական խաղաղության գործընթացն է քննարկել
ՀՀ-ն քանի՞ դիմում է ներկայացրել ընդդեմ Ադրբեջանի․ Միջազգային իրավական հարցերով ՀՀ ներկայացուցչի գրասենյակի մեկնաբանությունը
Քաղաքականություն
31.10.2024 | 12:50
Միազգային իրավական հարցերով ՀՀ ներկայացուցչի գրասենյակն ուղիղ չի պատասխանում հարցին, թե Հռոմի ստատուտը վավերացնելուց հետո ՀՀ-ն քանի՞ դիմում է ներկայացրել ընդդեմ Ադրբեջանի։
Factor.am-ի գրավոր հարցին ի պատասխան՝ գրասենյակից նշել են․ «ՀՀ կառավարությունը ներկայումս գտնվում է Հռոմի կանոնադրության վավերացումից բխող անհրաժեշտ միջոցառումերի իրականացման փուլում։ Ներկայումս իրականացվում են Միջազգային քրեական դատարանի հետ Հայաստանի Հանրապետության համագործակցության մասին օրենքի նախագծի մշակման աշխատանքներ։ Նշված օրենքի առկայությունն անհրաժեշտ նախապայման է Միջազգային քրեական դատարանի հետ լիարժեք համագործակցություն ապահովելու, այդ թվում՝ դատարանի իրավասության վերաբերող իրավիճակները ներկայացնելու համար»։
Հիշեցենք, որ 2023 թվականի հոկտեմբերին ԱԺ-ն ընդունեց Միջազգային քրեական դատարանի Կանոնադրությունը (Հռոմի ստատուտ) վավերացնելու և հետադարձ ուժով իրավազորությունը ճանաչելու մասին հայտարարության օրենքի նախագիծը:
Կառավարությունը ստատուտի ընդունումն ու դրան հետադարձ ուժ տալը հիմնավորել է նրանով, որ 2021 թ. մայիսից սկսած` Ադրբեջանի զինված ուժերը, ռազմական ագրեսիա իրականացնելով, ներխուժեցին Հայաստանի Հանրապետության ինքնիշխան տարածք և շարունակում են մնալ ինքնիշխան տարածքի տարբեր հատվածներում: Այնուհետև, 2022 թ. սեպտեմբերի 13-14-ին Ադրբեջանի զինված ուժերը ՀՀ ինքնիշխան տարածքի տարբեր հատվածների ուղղությամբ իրականացրել են նոր լայնածավալ ռազմական ագրեսիա, որը հանգեցրել է հարյուրավոր զոհերի զինված ուժերի և քաղաքացիական բնակչության շրջանում: Այդ ընթացքում կատարվել են ծանրագույն պատերազմական հանցագործություններ:
2023 թ. մարտի 17-ին Հաագայի միջազգային քրեական դատարանը Ռուսաստանի Դաշնության նախագահ Վլադիմիր Պուտինի ձերբակալության միջազգային օրդեր էր տվել, և ՀՀ-ի կողմից Հռոմի ստատուտին միանալը բուռն դժգոհություն առաջացրեց Կրեմլում։ ՀՀ կառավարությունը շտապեց հայտարարել, որ Հռոմի ստատուտը վավերացնում է, որպեսզի Ադրբեջանին պատասխանատվության ենթարկի, հայցեր ներկայացնեն ընդդեմ Ադրբեջանի ռազմական ղեկավարության և կատարված հանցագործությունների։
Մանյա Պողոսյան
