Ալիևը ռազմական համագործակցության հարցեր է քննարկել Պակիստանի շտաբների պետերի միացյալ կոմիտեի նախագահի հետ

Ադրբեջանի նախագահ Իլհամ Ալիևը Պակիստանի շտաբների պետերի միացյալ կոմիտեի նախագահ, գեներալ Սահիր Շամշադ Միրզայի պատվիրակության հետ հանդիպմանն ընդգծել է, որ այս այցը լավ հնարավորություն է՝ երկու երկրների միջև ամուր գործընկերության, պաշտպանության և այլ ոլորտներում համագործակցության հարցերը վերանայելու համար։ Ադրբեջանական կողմի հաղորդմամբ՝ նա նաև ընդգծել է, որ «այս տարվա պետական ​​այցը եղբայրական Պակիստան շատ հաջող և արդյունավետ է եղել»։

Ըստ Ալիևի՝ Աադրբեջանն ու Պակիստանը միշտ աջակցել են միմյանց տարածքային ամբողջականության և ինքնիշխանության հարցերում և կշարունակեն դա անել ապագայում։ Նա նաև հիշեցրել է, որ Պակիստան իր այցի ընթացքում հայտարարություն է արվել այդ երկրում 2 միլիարդ դոլարի ներդրման հնարավորության մասին։

Անդրադառնալով պաշտպանության ոլորտում համագործակցությանը՝ Իլհամ Ալիևն ասել է, որ տեսել է JF-17C ինքնաթիռը, որը որոշ ժամանակ առաջ ընդգրկվել է Ադրբեջանի ռազմաօդային ուժերի զինանոցում՝ հավելելով, որ այն լավագույն ինքնաթիռներից է աշխարհում։ Նա վստահություն է հայտնել, որ հաջող արդյունքների կհասնեն պաշտպանական արդյունաբերության ոլորտում, այդ թվում՝ արտադրության, ներդրումների և տեխնոլոգիաների։

Ալիևը նշել է, որ Ադրբեջանում անհամբերությամբ սպասում են Պակիստանի վարչապետ Մուհամմադ Շահբազ Շարիֆի մասնակցությանը COP29 համաժողովին և հաջորդ տարի երկիր նրա պետական ​​այցին։

Հիշեցնենք, որ սեպտեմբերին Ալիևին էին ներկայացվել Պակիստանից գնված JF-17C (Block-III) կործանիչները։

Թարգմանությունը՝ Էմմա Չոբանյանի