Ալիևին են ներկայացվել Պակիստանից գնված JF-17C կործանիչները․ ԼՈՒՍԱՆԿԱՐՆԵՐ

Ադրբեջանի նախագահ Իլհամ Ալիևին են ներկայացվել ժամանակակից, թեթև, բոլոր եղանակային պայմանների համար նախատեսված բազմաֆունկցիոնալ JF-17C (Block-III) ինքնաթիռները, որն ադրբեջանական կողմը գնել է Պակիստանից։ Ըստ տեղական լրատվամիջոցների՝ ինքնաթիռներն արդեն իսկ ընդգրկված են Ադրբեջանի ռազմաօդային ուժերի զինանոցում։

Դրանք մշակվել են Պակիստանի ավիացիոն համալիրի և Չինաստանի Չենդու ավիացիոն կորպորացիայի համատեղ նախագծի շրջանակում, ունակ են թռչել ցերեկային և գիշերային ռեժիմներով։

Ադրբեջանի ՊՆ ղեկավար Զաքիր Հասանովն ու Պակիստանի ավիացիոն համալիրի նախագահ, փոխմարշալ Հաքիմ Ռազան Ալիևին տեղեկացրել են ինքնաթիռի մարտավարական և տեխնիկական բնութագրերի ու այլ ցուցիչների, ինչպես նաև դրա շահագործման կանոնների մասին։ Նշվել է, որ JF-17C-ն (Block-III) միաշարժիչ բազմանպատակային մարտական ​​ինքնաթիռ է։

Հավելենք, որ դեռևս 2021 թվականի վերջին տեղեկություններ էին տարածվել, որ Բաքուն հետաքրքրված է պակիստանյան կործանիչներով։ Մասնավորապես, այդ մասին հայտարարել էր Իսլամաբադում Ադրբեջանի դեսպանատան ռազմական կցորդ Մեհման Նովրուզովը։

2024-ի հուլիսին էլ Ադրբեջանի նախագահ Իլհամ Ալիևը երկօրյա պետական այցով Պակիստանում էր: Կողմերը քննարկել էին պաշտպանական արդյունաբերության նախագծեր։ Ալիևը Պակիստանի ռազմաօդային ուժերի Նուր Խան բազայի Իսլամաբադի Ազգային օդատիեզերական գիտատեխնիկական պարկում (NASTP) մասնակցել էր նաև ռազմական ցուցահանդեսի։

Միաժամանակ, այս տարվա փետրվարին տեղեկություններ էին տարածվել, որ Ադրբեջանի ռազմաօդային ուժերն ու Պակիստանի ավիացիոն համալիրը պայմանագիր են կնքել, որը կդառնա ասիական երկրի պատմության մեջ ամենամեծը։ Պայմանագրի համաձայն՝ Ադրբեջանը ձեռք է բերելու JF-17C Block-III կործանիչներ, ինչպես նաև ռեակտիվ ինքնաթիռների ուսումնական և մարտական ​​զինամթերք։ Համաձայնագրի արժեքը գնահատվում է 1,6 մլրդ դոլար։

Թուրքական աղբյուրներն էլ հայտնել էին, որ Պակիստանից Ադրբեջանի պատվիրած JF-17 Block III կործանիչները համալրվելու են թուրքական պաշտպանական արդյունաբերության կողմից արտադրված Bozdoğan և Gökdoğan «օդ-օդ» հրթիռներով։

Էմմա Չոբանյան