07.10.2026 | 13:24
Մոսկվայում ԱՄՆ դեսպանատունն առողջապահական տագնապ է տարածել՝ ամերիկացիներին կոչ անելով չմեկնել ՌԴ
Բաքվում ԵՄ դեսպանն Ադրբեջանի ԱԳՆ է կանչվել․ նրան բողոքի նոտա է հանձնվել
Քաղաքականություն
25.10.2024 | 17:53
Ադրբեջանում Եվրամիության դեսպան Պյոտր Միխալկոն կանչվել է Ադրբեջանի ԱԳՆ։ Ադրբեջանական կողմը Միխալկոյին բողոքի նոտա է հանձնել հոկտեմբերի 24-ին Եվրախորհրդարանի կողմից ընդունված «անհիմն ու կողմնակալ հակաադրբեջանական բանաձևի կապակցությամբ»։
Բաքուն խստորեն դատապարտել է հոկտեմբերի 24-ին Եվրախորհրդարանի ընդունած բանաձևը, ինչպես նաև եվրահանձնակատարի կողմից Եվրախորհրդարանում քննարկումների ժամանակ արված «անհիմն և կողմնակալ հայտարարությունները»։
Նշվում է, թե «ԵՄ տարբեր կառույցների միջոցով Ադրբեջանի դեմ զրպարտչական արշավի շարունակումը, Ադրբեջանի ինքնիշխանությունն ու տարածքային ամբողջականությունը ոտնահարող հայտարարություններն ու քայլերը, միջամտությունը երկրի ներքին գործերին խրախուսում են ռևանշիզմը Հայաստանում և դրանով իսկ վնասում տարածաշրջանում խաղաղություն հաստատելու ջանքերին»։
«Ադրբեջանը Եվրամիության հետ հարաբերությունները կառուցում է միջազգային իրավունքի նորմերի և սկզբունքների, փոխադարձ հարգանքի, հավասարության և փոխշահավետության հիման վրա և կոչ է անում ԵՄ-ին՝ խստորեն պահպանել այդ հիմնարար սկզբունքները»,- ասվում է հայտարարության մեջ։
Ադրբեջանի ԱԳՆ-ն նաև ԵՄ-ից պահանջել է զերծ մնալ «Ադրբեջանի ինքնիշխանությունն ու տարածքային ամբողջականությունը ոտնահարող, տարածաշրջանում խաղաղությունն ու կայունությունը խաթարող կանխակալ քայլերից, ինչպես նաև երկրի ներքին գործերին միջամտելուց»։
Հավելենք, որ ավելի վաղ Եվրախորհրդարանի ընդունած բանաձևը դատապարտել էր նաև Ադրբեջանի Միլլի Մեջլիսը։
Թարգմանությունը՝ Էմմա Չոբանյանի
