Մեծ Բրիտանիան չեղարկել է Վրաստանի հետ պաշտպանական ոլորտի հետ կապված բանակցությունները

Մեծ Բրիտանիայի իշխանությունները որոշել են սառեցնել Վրաստանի հետ երկխոսությունը նախարարների մակարդակով, հայտարարել է Միացյալ Թագավորության դեսպան Գարեթ Ուորդը։ Նրա խոսքով՝ բրիտանական կողմը նաև կասեցրել է կիբերանվտանգության նոր ծրագիրը։ Որպես պատճառ նա նշել է վրացական իշխանությունների քաղաքականությունը։

«Տասը տարվա մեջ առաջին անգամ մենք՝ բրիտանական կողմը, որոշեցինք սառեցնել ամենամյա Ուրդրոբի բարձր մակարդակի նախարարական երկխոսությունը: Երկխոսության ձևաչափի հիմնադրումից ի վեր սա առաջին դեպքն է։ Մենք նաև չեղարկեցինք բարձր մակարդակի ծրագրված բանակցությունները պաշտպանական գերատեսչությունների ղեկավարների միջև»,- ասել է Ուորդը վրացական «Ինտերփրեսնյուզ» գործակալությանը տված հարցազրույցում:

Դիվանագետը պարզաբանել է, որ Վրաստանի հարաբերությունները Մեծ Բրիտանիայի, ինչպես նաև արևմտյան այլ գործընկերների հետ այս տարի «փչացել են Վրաստանի կառավարության քայլերով»։ Նա, մասնավորապես, նշել է խորհրդարանի ընդունած օրենքը օտարերկրյա գործակալների մասին։

«Մենք հիասթափվեցինք, երբ «Վրացական երազանք»-ի առաջնորդները սկսեցին դավադրության տեսություններ քարոզել և ենթադրություններ անել, որ արևմտյան գործընկերները խարխլում են Վրաստանը: Մենք ցնցվեցինք, երբ «Վրացական երազանքը» ընդդիմադիր կուսակցությունների արգելքը անվանեց իր նախընտրական ծրագրի խոստում»,- թվարկել է դեսպանը։

Մայիսին Վրաստանի խորհրդարանն ընդունել է «Արտաքին ազդեցության թափանցիկության մասին» օրենքը, որը հայտնի է որպես «Օտարերկրյա գործակալների մասին» օրենք: Փաստաթղթի քննարկումն ուղեկցվել է զանգվածային բողոքի ցույցերով։ Նախագահ Սալոմե Զուրաբիշվիլին, որը գլխավորում էր ընդդիմադիր կոալիցիան խորհրդարանական ընտրություններից առաջ, Սահմանադրական դատարանի միջոցով փորձել է կասեցնել օրենքը, սակայն դատարանը չի գնացել այդ քայլին։ Եվրամիությունը քննարկում է Վրաստանի հետ առանց վիզայի ռեժիմը կասեցնելու հարցը։

Թարգմանությունը՝ Տաթև Ֆռանգյանի