Ադրբեջանի ԶՈւ երկրորդ բանակային կորպուսի հրամանատարը զինծառայողների խոշտանգման աղմկահարույց գործով հեռացվել է աշխատանքից

Ադրբեջանի ԶՈւ երկրորդ բանակային կորպուսի հրամանատար, գեներալ-լեյտենանտ Մայիս Բարխուդարովը երկրի նախագահ Իլհամ Ալիևի հրամանագրով ազատվել է աշխատանքից, հայտնում են տեղական իշխանական լրատվամիջոցները։ Ադրբեջանի ՊՆ-ն այս տեղեկությունը պաշտոնապես չի մեկնաբանել։

Լրատվամիջոցները, միաժամանակ, հայտնում են, որ Բարխուդարովի հեռացումը կապված է աղմկահարույց «Տերտերի գործի» և զինծառայողների խոշտանգմանը նրա մասնակցության հետ։

2017 թվականի մայիսին Ադրբեջանի պաշտպանության, ներքին գործերի նախարարությունները, գլխավոր դատախազությունը և պետական ​​անվտանգության ծառայությունը հայտարարել էին Ադրբեջանի Զինված ուժերի զինծառայողների ձերբակալման մասին, իբր, Հայաստանի օգտին լրտեսության մեղադրանքով։ 2019-ին հայտնի դարձավ, որ մեղադրյալների նկատմամբ կիրառվել են զանգվածային խոշտանգումներ և ինքնախոստովանական ցուցմունքներ կորզվել։ Տուժել են հարյուրավոր զինծառայողներ  ու սպաներ։

Զոհերի հարազատների բազմաթիվ բողոքներից հետո Ադրբեջանի իշխանությունները ստիպված են եղել վերանայել գործը։

Միայն 2021 թվականին երկրի զինվորական դատախազ Խանլար Վելիևն ընդունել է զանգվածային խոշտանգումների առկայությունը և հայտարարել քրեական գործեր հարուցելու մասին։ Հետաքննության ընթացքում տուժողները որպես խոշտանգումների և գոյություն չունեցող լրտեսության մեղադրանքի նախաձեռնողներ նշել են գեներալներ Հիքմեթ Հասանովի (աշխատանքից ազատված է), Մայիս Բարխուդարովի, ինչպես նաև ՊՆ այլ բարձրաստիճան սպաների անունները։

Հավելենք, որ Բարխուդարովը մասնակցել է 2016 թվականի Ապրիլյան քառօրյա, ինչպես նաև 2020-ի Արցախյան 44-օրյա պատերազմներին։

Հրապարակված ոչ պաշտոնական տեղեկությունների համաձայն՝ Բարխուդարովի փոխարեն նշանակվել է գեներալ-մայոր Վիլայաթ Գուլիևը, որը նույնպես 44-օրյա պատերազմի մասնակից է։

Այսօր լրատվամիջոցների հետ զրույցում Բարխուդարովը մեկնաբանել է իր պաշտոնանկությունը․ «Ես հիասթափություն չունեմ։ Որոշումն ընդունված է»։

Պատասխանելով հարցին, թե սպասո՞ւմ է բանակում նոր բարձր պաշտոնի, ադրբեջանցի գեներալը նշել է․ «Այդ մասին ոչինչ չգիտեմ»։

Էմմա Չոբանյան