Իրանը հայտարարել է իսրայելական ռազմաօդային ուժերի երկու բազաներին և «Մոսադ»-ի շտաբին հարվածներ հասցնելու մասին

Իրանի ԶՈՒ Գլխավոր շտաբի պետ, գեներալ-լեյտենանտ Մոհամմադ Բաղերին հայտարարել է, որ Իսրայելի վրա հրթիռային հարձակումը «պատասխանն էր սիոնիստների բազմաթիվ հանցագործություններին»։ Ըստ նրա՝ հարձակման թիրախ են դարձել իսրայելական ռազմաօդային ուժերի երկու բազաներ, ինչպես նաև իսրայելական հետախուզական «Մոսադ» ծառայության շտաբը, փոխանցում է Tasnim-ը։

Բաղերին ասել է, որ Իրանը «զսպվածություն դրսևորեց» հուլիսին իսրայելական բանակի հարձակումից հետո, սակայն «Հըզբոլլահ»-ի գլխավոր քարտուղար Հասան Նասրալլայի սպանությունից հետո նրա «համբերությունը հատեց»: Նրա խոսքով՝ «վիճակը դարձել է անտանելի»։

Հարվածները ներառել են «Մոսադ»-ի շտաբը, որը Բաղերին նկարագրել է որպես ահաբեկչության կենտրոն, «Նևաթիմ» ավիաբազան, որտեղ տեղակայված են F-35 կործանիչները, և «Հացերիմ» բազան, որը, իբր, օգտագործվել է Նասրալլայի սպանությունը կազմակերպելու համար: Իսրայելը հայտնել է, որ «Մոսադ»-ի շտաբը չի տուժել, հայտնում է Axios-ը։

Նախօրեին Իսրայելի պաշտպանության բանակը հայտնել էր, որ Իրանը շուրջ 180 հրթիռ է արձակել հրեական պետության ուղղությամբ, որոնցից շատերը որսացել են։ Այդուհանդերձ, սոցցանցերում հրապարակված տեսանյութերում երևում է, թե ինչպես են հրթիռներն ընկնում երկրի տարբեր հատվածներում։ Իսրայելի տարածքի վրա հարձակման հետևանքով մեկ մարդ է զոհվել՝ անօրինական ներգաղթյալ Գազայի հատվածից։ Շտապօգնության ծառայությունը հայտնել է մի քանի անձանց բեկորային վնասվածքներ ստանալու մասին։

Թարգմանությունը՝ Տաթև Ֆռանգյանի