Բայրամովը դժգոհել է Հայաստանի Սահմանադրությունից և ռազմական ծախսերի աճից

Ադրբեջանի ԱԳ նախարար Ջեյհուն Բայրամովը Բաքվում Սերբիայի ԱԳ նախարար Մարկո Ջուրիչի հետ մամուլի ասուլիսում կրկին անդրադարձել է ՀՀ Սահմանադրությանը։

«Հայաստանի Սահմանադրությունը, ինչպես նաև մի շարք նորմատիվ-իրավական ակտեր դեռևս տարածքային պահանջներ են պարունակում Ադրբեջանի նկատմամբ: Ես հայտարարել եմ,  որ դա ամենալուրջ սպառնալիքն է խաղաղության և կարգավորման գործընթացի համար։ Եթե ​​Հայաստանը շահագրգռված է տարածաշրջանում խաղաղությամբ, ապա պետք է լուրջ քայլեր ձեռնարկի»,- ասել է Բայրամովը։

Նա նշել է, որ իր սերբ գործընկերոջը տեղեկացրել է 2020 թվականին Արցախ դեմ սանձազերծված 44-օրյա պատերազմի, 2023-ին իրականացրած էթնիկ զտման, Արցախի տարածքներում իրականացվող աշխատանքների, հայ-ադրբեջանական հարաբերությունների կարգավորման ուղղությամբ Բաքվի ձեռնարկած քայլերի մասին։

«Բացի այդ, ես նշել եմ  դրական քայլերը երկու երկրների միջև սահմանազատման ուղղությամբ։ Միևնույն ժամանակ, ես նշել եմ Հայաստանի շատ ինտենսիվ սպառազինումը․ 2024 թվականի համեմատ՝ Հայաստանի ռազմական բյուջեն աճել է մոտ 50 տոկոսով։ Այս գործընթացը խոչընդոտում է տարածաշրջանում խաղաղության և կայունության հաստատմանը։ Այս ոլորտում Հայաստանի ոչ ճիշտ քաղաքականությունը և որոշ երկրների կողմից Հայաստանին աջակցության հրահրումը շարունակում են վտանգ ներկայացնել տարածաշրջանի համար։ Իհարկե, այդ բոլոր գործընթացները վերահսկվում են մեր կողմից։ Եթե ​​Հայաստանն անկեղծորեն շահագրգռված է խաղաղ գործընթացով, ապա պետք է լրջորեն դիտարկի ձեռնարկված քայլերը։ Եվ մենք այստեղ մեծ փոփոխություններ ենք ակնկալում»,- հավելել է Բայրամովը։

Հարկ է նկատել, որ Բաքուն շարունակում է ինտենսիվ սպառազինման գործընթացը և այս հարցում նրա գործընկերներից է հենց Սերբիան։ Մամուլի ասուլիսում Սերբիայի ԱԳ նախարարը հայտարարել է, որ Բելգրադը ցանկանում է ամրապնդել համագործակցությունը Բաքվի հետ նաև ռազմական ոլորտում։

Ավելի վաղ Սերբիայի  նախագահ Ալեքսանդր Վուչիչը հայտարարել էր, որ Ադրբեջանի հետ զենքի մատակարարման ավելի քան 400 մլն դոլարի պայմանագիր են ստորագրել։

Էմմա Չոբանյան