Վրաստանում ցածր եկամուտ ունեցող ընտանիքներին օգնող հիմնադրամը հայտարարել է լուծարման մասին՝ «օտարերկրյա գործակալների» մասին օրենքի պատճառով

«Օտարերկրյա գործակալների» մասին օրենքի պատճառով «Բարության հեղափոխություն» կազմակերպությունը, որն օգնում էր ցածր եկամուտ ունեցող ընտանիքներին, դադարեցրել է գործունեությունը Վրաստանում, գրում է NewsGeorgia-ն։

«Ընկերնե՛ր, «Բարության հեղափոխություն» հիմնադրամը դադարեցնում է իր գործունեությունը»,- ասված է կազմակերպության ֆեյսբուքյան էջում արված գրառման մեջ։

Հիմնադրամը գործել է բացառապես մասնավոր անձանց նվիրատվությունների շնորհիվ: Սակայն հիմա չի կարող գործունեություն ծավալել «օտարերկրյա գործակալների» մասին օրենքի պատճառով։ Կազմակերպությունից պարզաբանել են, որ իրենք այժմ ընտրության առաջ են՝ կա՛մ գրանցվել «Օտարերկրյա ուժերի շահերը խթանող կազմակերպությունների ռեեստրում», կա՛մ լուծարվել։ Եթե «Բարության հեղափոխությունը» հրաժարվի գրանցումից կամ Արդարադատության նախարարությանը տրամադրի իր բոլոր եկամուտների ու ծախսերի մասին թերի փաստաթղթեր, ապա կենթարկվի խոշոր տուգանքի։

«Հիմնադրամի միջոցները հիմնականում գոյացել են ամենամոտ ընկերների նվիրատվություններով։ Նրանց թվում են եղել իմ երեք ընկերները Եվրոպայից, ովքեր պարբերաբար գումար են փոխանցել հիմնադրամի հաշվեհամարին։ Հիմնադրամի ամսական եկամուտը կազմել է 1200-2000 լարի, ինչը հնարավորություն է տվել ամսական ֆինանսավորել 3-ից 5 ընտանիքի։ Ավելացնեմ, որ 3 տարում հիմնադրամն ամբողջ Վրաստանում օգնել է 400 ընտանիքի և ոչ ոք ֆինանսական օգուտ չի ստացել… Մի խոսքով՝ այն հիմնված է եղել բացառապես կամավորության վրա»,- ասվում է հայտարարության մեջ։