Քաղաքականություն
29.08.2024 | 14:19
ՌԴ Քննչական կոմիտեին չի հաջողվել բացահայտել 2022 թվականի հոկտեմբերին Ղրիմի կամրջի պայթյունի բոլոր հանցակիցներին, գրում է ՏԱՍՍ-ը՝ վկայակոչելով դատական փաստաթղթերը։
Այս կապակցությամբ, մասնավորապես, երկարացվել է այս գործով երեք կասկածյալների կալանքը։ Հետաքննությունը կարծում է, որ ազատության մեջ գտնվելու ժամանակ նրանք «կշփվեն այլ հանցակիցների հետ»՝ քրեական պատասխանատվությունից խուսափելու կամ ապացույցները ոչնչացնելու նպատակով։
Քննությունը Օլեգ Անտիպովին, Ալեքսանդր Բիլինին և Դմիտրի Տյաժելիխին կասկածում է կամրջի վրա տեղի ունեցած պայթյունին մասնակցության մեջ։ Անտիպովը, ըստ քննիչների, գտել է բեռնատար, որով պայթուցիկ են տեղափոխել։ Բայլինը գլխավորել է Extra ընկերությունը, որին, ըստ քննիչների, պետք է ուղարկվեր բեռը։
Նրանցից բացի՝ մեղադրանք է առաջադրվել ևս հինգ անձի, այդ թվում՝ Հայաստանի և Ուկրաինայի քաղաքացիների։ Գործով նախաքննությունն ավարտվել է։ Երբ մեղադրական եզրակացությունը հաստատվի Գլխավոր դատախազության կողմից, գործը կփոխանցվի Հարավային շրջանի զինվորական դատարան։
Ղրիմի կամրջի վրա պայթյունը տեղի է ունեցել 2022 թվականի հոկտեմբերի 8-ին։ Մասամբ փլուզվել է կամրջի ավտոմոբիլային մասի ճյուղերից մեկը, իսկ երկաթուղային հատվածում նավթ տեղափոխող գնացքը հրդեհվել է։ 2023 թվականի օգոստոսին Ուկրաինայի Անվտանգության ծառայության ղեկավար Վասիլի Մալյուկը հայտարարել է, որ ինքն ու իր վստահելի երկու աշխատակիցներ անձամբ ներգրավված են եղել պայթյունի պլանի մշակման և դրա իրականացման գործում։
