ԵԱՀԿ/ԺՀՄԻԳ-ն Ադրբեջանում խորհրդարանական ընտրությունների վերաբերյալ միջանկյալ զեկույց այս անգամ չի հրապարակելու

Ադրբեջանում սեպտեմբերի 1-ին կայանալիք Միլլի Մեջլիսի արտահերթ ընտրությունների համար ԵԱՀԿ/ԺՀՄԻԳ դիտորդական առաքելությունն այսօր հայտարարել է իր գործունեության մեկնարկի մասին, գրում են ադրբեջանական լրատվամիջոցները։

Բաքվում տեղի ունեցած մամուլի ասուլիսում ԵԱՀԿ/ԺՀՄԻԳ դիտորդական առաքելության ղեկավար, Ալբանիայի ներկայացուցիչ Դիտմիր Բուշաթին ասել է, որ առաքելության կազմում ընդգրկված են ընտրությունների, իրավունքի, ԶԼՄ-ների և այլ ոլորտների 11 փորձագետներ, ինչպես նաև 28 երկարաժամկետ դիտորդներ, որոնք գործունեություն կսկսեն Ադրբեջանի շրջաններում օգոստոսի 8-ից։

Քվեարկությանը նախորդող օրը Ադրբեջան են ժամանելու ևս 280 կարճաժամկետ դիտորդներ։ Բացի այդ, ընտրություններին կուղարկվի խումբ՝ ԵԱՀԿ-ից հատուկ համակարգողի և կարճաժամկետ առաքելության ղեկավարի գլխավորությամբ։

ԵԱՀԿ/ԺՀՄԻԳ դիտորդական առաքելությունը վերահսկելու է նախընտրական քարոզարշավի բոլոր ասպեկտները, ներառյալ՝ բոլոր մակարդակներում ընտրական հանձնաժողովների աշխատանքը, ընտրական օրենսդրությունը և դրա իրականացումը, հիմնարար ազատությունների հարգումը, ԶԼՄ-ներում և սոցիալական հարթակներում ընտրությունների լուսաբանումը և ընտրական վեճերի լուծումը: Դիտորդները գնահատելու են նաև ԺՀՄԻԳ-ի նախորդ առաջարկությունների կատարման վիճակը։ Առաքելության նախնական եզրակացությունը հրապարակվելու է սեպտեմբերի 2-ին, իսկ վերջնական զեկույցը՝ մեկ ամիս անց:

Ի տարբերություն նախորդ ընտրությունների՝ այս անգամ ԵԱՀԿ/ԺՀՄԻԳ-ը չի նախատեսում հրապարակել միջանկյալ զեկույց։ Սա նշանակում է, որ առաքելությունը կխուսափի քարոզարշավին գնահատական ​​տալուց մինչև ընտրությունները։

Ադրբեջանական Թուրան գործակալությունը նշում է, որ առաքելության ղեկավարը շատ զգուշավոր է եղել իր հայտարարություններում։ Պատասխանելով հարցին՝ «արդյո՞ք իմաստ կա Ադրբեջանում ընտրությունները մշտադիտարկելը, եթե կառավարությունը չի կատարում ԵԱՀԿ/ԺՀՄԻԳ-ի նախկին հանձնարարականները», Բուշաթին ասել է, որ  առաքելությունը տեղակայվել է Ադրբեջանի կառավարության հրավերով, և ԵԱՀԿ յուրաքանչյուր երկիր պարտավոր է հրավիրել ԺՀՄԻԳ դիտորդներին։

«Մենք չենք խառնվում ընտրությունների գործընթացին, ոչ մեկին չենք աջակցում։ Մենք դիտարկում ենք ու գնահատական տալիս բուն գործընթացին»,- նշել է նա։

Հարցին էլ՝ ինչպե՞ս կազդի կառավարության կողմից ԵԽԽՎ դիտորդական առաքելությանը չհրավիրելը ընտրությունների թափանցիկության վրա, Բուշաթին խուսափել է մեկնաբանություններից՝ ասելով, որ իրավասու է խոսել միայն ԺՀՄԻԳ դիտորդական առաքելության անունից։ Նա նաև ասել է, որ պատրաստ են հնարավորինս համագործակցել այլ դիտորդական առաքելությունների հետ, սակայն ընտրությունները գնահատելու են իրենց սկզբունքներով ու չափանիշներով։

Հիշեցնենք՝ պաշտոնական Բաքուն ԵԽԽՎ առաքելությանը չի հրավիրել խորհրդարանական արտահերթ ընտրությունների մշտադիտարկման համար։

Հավելենք նաև, որ փետրվարի 7-ին Ադրբեջանում կայացած արտահերթ նախագահական ընտրություններին դիտարկմանը նույնպես ԵԱՀԿ/ԺՀՄԻԳ-ը մասնակցել էր ու հայտարարել, որ դրանք անցել են լուրջ խախտումներով։

Էմմա Չոբանյան