15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Ադրբեջանի ԱԳՆ-ն հաստատում է՝ ԵԽԽՎ-ն չի հրավիրվել Մեջլիսի արտահերթ ընտրությունները դիտարկելու
Քաղաքականություն
29.07.2024 | 19:43
Եվրոպայի խորհրդի խորհրդարանական վեհաժողովին Ադրբեջանի Միլլի Մեջլիսի սեպտեմբերի 1-ի արտահերթ ընտրությունները դիտարկելու հրավեր չի ուղարկվել։ Այս մասին ադրբեջանական լրատվամիջոցներին հայտնել է Ադրբեջանի ԱԳՆ խոսնակ Այխան Հաջիզադեն։
«Արտաքին գործերի նախարարությունը հրավիրել է ԵԱՀԿ/ԺՀՄԻԳ-ին, ԱՊՀ-ին, ԻՀԿ-ին, ՎՈՒԱՄ-ին, Չմիավորման շարժման երիտասարդական կազմակերպությանը, Շանհայի համագործակցության կազմակերպությանը և Թյուրքական պետությունների կազմակերպությանը»,- ասել է նա՝ չնշելով ԵԽԽՎ-ին չհրավիրելու պատճառները։
Օրերս ադրբեջանական լրատվամիջոցները հրապարակել էին միջազգային կազմակերպությունների ցուցակը, որոնք հրավիրվել են դիտորդական առաքելություն իրականացնելու համար։ Ցանկում ԵԽԽՎ-ն բացակայում էր։
Միլլի Մեջլիսն իր հերթին հրավիրել է 13 կազմակերպությունների՝ ԵԱՀԿ Խորհրդարանական վեհաժողով, ԱՊՀ ՄԽՎ, Թյուրքական պետությունների կազմակերպության խորհրդարական վեհաժողով, Իսլամական համագործակցության կազմակերպության խորհրդարանական միություն, Սևծովյան տնտեսական համագործակցության կազմակերպության խորհրդարանական վեհաժողով, ՎՈՒԱՄ-ի ԽՎ, Ասիական խորհրդարանական վեհաժողով, Համաաֆրիկյան խորհրդարան, Տնտեսական համագործակցության կազմակերպության խորհրդարանական վեհաժողով, Հարավարևելյան Ասիայի պետությունների ասոցիացիայի միջխորհրդարանական կազմակերպություն, Արաբական խորհրդարան, Խորհրդարանականների միջազգային կոնգրես, Ասիական քաղաքական կուսակցությունների միջազգային համաժողով։
Ի դեպ, Ադրբեջանը ԵԽԽՎ պատվիրակությանը չի հրավիրել նաև դիտորդական առաքելություն իրականացնելու այս տարվա փետրվարի 7-ին կայացած արտահերթ նախագահական ընտրություններում։
ԵԽԽՎ պատվիրակությանը չհրավիրելու պատճառներից մեկը ԵԽԽՎ-ում ադրբեջանական պատվիրակության լիազորությունները դադարեցնելն է։ Հունվարի 24-ին ԵԽԽՎ-ն քվեարկությամբ որոշել էր չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ է մնացել։
Էմմա Չոբանյան
