«Հայ, թուրք, ադրբեջանցի․ ինչի՞ համար են էդ շահարկումները»․ Նիկոլ Փաշինյան․ ՏԵՍԱՆՅՈՒԹ

Վարչապետ Նիկոլ Փաշինյանն անդրադարձավ Սյունիքում հայ կնոջ վրա կրակած ադրբեջանցի զինծառայողի ձերբակալության տեսանկարահանմանն ու դրա հրապարակման նպատակահարմարությանը՝ ընդգծելով, որ թեմայի շուրջ ընթացող շահարկումներն անընդունելի են։

Խորհրդարանում հարցուպատասխանի ընթացքում «Ուժեղ Հայաստան» խմբակցության պատգամավոր Լիաննա Գասպարյանը հետաքրքրվեց՝ հայ քաղաքացիների ձերբակալության կադրերը հաճախ հայտնվում են սոցիալական ցանցերում, մինչդեռ ադրբեջանցու ձերբակալման գործընթացը չի տեսանշվում կամ չի հանրայնացվում։

Արձագանքելով հարցադրմանը՝ Նիկոլ Փաշինյանն ընդգծեց, որ «հայ, թուրք, ադրբեջանցի» շեշտադրումներն ու շահարկումները որևէ օգուտ չեն բերում։

«Այդ դեպքը, որը տեղի է ունեցել, ընդհանրապես որևէ ընդհանրություն չունի բոլոր այն շահարկումների հետ, որ մենք այսօր մեր դաշտում տեսնում ենք։ Ընդհուպ բանը հասել է այնտեղ, որ մարդիկ կասկածի տակ են դնում հաստատված խաղաղությունը»,- ասաց նա։

Վարչապետի խոսքով՝ որոշ շրջանակների համար կապ չունի, թե ինչ պայմաններում է դեպքը տեղի ունեցել, քանի որ նրանց քաղաքական ասելիքը դրանից չի փոխվում։

Անդրադառնալով կադրերի առկայությանն ու հրապարակմանը՝ Փաշինյանը հայտնեց, որ նախկին դեպքերը նկատի ունենալով՝ ինքը խնդրել է իրավապահներին խուսափել ձերբակալությունների նմանատիպ կադրեր հրապարակելուց։

Վարչապետը նաև հավելեց, որ ադրբեջանցի զինվորը ձերբակալման պահին դիմադրություն ցույց չի տվել և ունեցել է վնասվածքներ․ «Ադրբեջանցի զինվորը, որի ձեռքին եղել է հրազեն, ակնհայտորեն ձերբակալության պահին դիմադրություն ցույց չի տվել ընդհանրապես։ Ինչքան հասկանում եմ, նաև որոշակի վնասվածքներ է ունեցած եղել, և գուցե նաև դա է պատճառը, որ ինչ-որ կոնկրետ կադրեր չեն հրապարակվել»։

Փաշինյանը խոստացավ լրացուցիչ ճշտել տեսանկարահանման առկայության վերաբերյալ մանրամասները։

Մանրամասները՝ տեսանյութում։

Եվգենյա Համբարձումյան