Հասարակություն
30.07.2024 | 15:30
Պոլսի Հայոց պատրիարք Սահակ Մաշալյանն արձագանքել է Փարիզի Օլիմպիական խաղերի բացման արարողությանը։ Anadolu-ն գրում է, որ նա սոցցանցերում գրառում է արել՝ դիմելով միջազգային օլիմպիական կոմիտեի անդամներին։
«Որպես քրիստոնյա առաջնորդ՝ ցանկանում եմ հայտարարել, որ դատապարտում եմ Օլիմպիական խաղերի բացման ժամանակ քրիստոնեական հավատքի նվաստացմանն ուղղված ելույթը։ Մեր Տեր Հիսուս Քրիստոսի վերջին ընթրիքը մեր հավատքի ամենասուրբ պահն է։ Այդ տգեղ տեսարանը, որի նպատակն է ծաղրել աշխարհը, խորապես վիրավորել է ողջ աշխարհի քրիստոնյաներին։ Չնայած Օլիմպիական խաղերը պետք է ուղղված լինեն հասարակությունների միջև ներդաշնակության և խաղաղության հաստատմանը, դրանք դարձել են գործիք, որը թույլ է տալիս նվաստացնել և վիրավորել ավելի քան երկու միլիարդ հետևորդ ունեցող կրոնը։ Իմ և իմ եկեղեցու անունից ես դատապարտում եմ Օլիմպիական խաղերի ղեկավար կազմին, որոնք անհրաժեշտ զգայունություն չեն ցուցաբերում այս հարցում»,- նշել է Մաշալյանը։
Նա հույս է հայտնել, որ խաղերի փակման արարողությանը թույլ չեն տրվի ավելորդ դրվագներ, իսկ առկա խնդիրները կլուծվեն։
Ավելի վաղ Փարիզի Օլիմպիական խաղերի կազմակերպիչները ներողություն էին խնդրել բոլորից, որոնց վիրավորել է բացման արարողության մի տեսարան, որը շատերին հիշեցրել է Լեոնարդո դա Վինչիի «Խորհրդավոր ընթրիքը» նկարը։
