23.11.2024 | 11:23
Արտարժույթների փոխարժեքները՝ նոյեմբերի 23-ի դրությամբ
Կրեմլը ռուս հասարակությանը պատրաստում է երկար պատերազմի և խոստանում է հաղթանակ. ISW
Քաղաքականություն
18.07.2024 | 16:06
Պատերազմի ուսումնասիրության ամերիկյան ինստիտուտի (ISW) վերլուծաբաններն իրենց ամենօրյա ակնարկում նշում են, որ ռուսական պետական լրատվական հրապարակումները մեկնաբանում են ՌԴ Անվտանգության խորհրդի փոխնախագահ Դմիտրի Մեդվեդևի` «Аргументы и Факты»-ին տված հարցազրույցը, որում նա ակնարկել է, թե ուկրաինական պետությունը կդադարի գոյություն ունենալ մինչև 2034 թվականը։
Սա, ամենայն հավանականությամբ, արվում է այն բանի համար, որպեսզի աջակցվի Ուկրաինայում ռուս հանրությանը երկարատև պատերազմի նախապատրաստելու Կրեմլի ջանքերին՝ խոստանալով, որ Ռուսաստանը կկատարի իր առջև դրած խնդիրը՝ մեկ տասնամյակում ոչնչացնելու ուկրաինական պետականությունը, ենթադրում են ISW-ի վերլուծաբանները։
Մեդվեդևը հայտարարել է, թե ՆԱՏՕ-ի գլխավոր քարտուղար Յենս Ստոլտենբերգն «իզուր չի ենթադրել», որ Ուկրաինան կարող է միանալ դաշինքին առաջիկա տասը տարվա ընթացքում, «այսինքն՝ երբեք»։ Ի վերջո, մինչ այդ «ՆԱՏՕ-ի ներկայիս երկրների ղեկավարներից ոչ մեկը պարզապես չի լինի իր պաշտոնում, իսկ ոմանք նույնիսկ չեն լինի այս աշխարհում։ Հավանական է, որ չի լինի նաև 404 տխրահռչակ երկիրը», հայտարարել էր նա։
Մեդվեդևն ուղղակիորեն չի ասել, որ Ուկրաինան կդադարի գոյություն ունենալ մինչև 2034 թվականը, սակայն ռուսական լրատվամիջոցները, այդ թվում՝ ՏԱՍՍ-ը, անմիջապես սկսել են հրապարակել այնպիսի վերնագրեր, ինչպիսիք են՝ «Մեդվեդևը խոստովանել է, որ Ուկրաինան կդադարի գոյություն ունենալ մինչ 2034 թվականը» և «Մեդվեդևը կանխատեսել է Ուկրաինայի անհետացումը մինչև 2034 թվականը»:
Ռուսական լրատվամիջոցների արձագանքը մի քանի հետևանքներ ունի, գրում են ISW-ի վերլուծաբանները։ Նախ՝ բացահայտ ենթադրությունը, որ Ռուսաստանը կկարողանա «կործանել Ուկրաինան» մինչև 2034 թվականը, կարելի է համարել մի տեսակ խոստում ռուս հասարակությանը, որ Ռուսաստանը կկարողանա հաղթել պատերազմում և հասնել ուկրաինական պետականության ոչնչացման իր նպատակին մեկ տասնամյակի ընթացքում։
Մեդվեդևի հայտարարության այս մեկնաբանությունը նաև հերքում է Կրեմլի հայտարարություններն Ուկրաինայի հետ խաղաղ բանակցություններ վարելու պատրաստակամության մասին և ընդգծում, որ պատերազմի միակ արդյունքը, որ Կրեմլը ցանկանում է, ուկրաինական պետության և ժողովրդի լիակատար ոչնչացումն է, կարծում են ինստիտուտի վերլուծաբանները։
