06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
Ալիևի կուսակցությունը որոշել է Մեջլիսի արտահերթ ընտրություններում պատգամավորի իր թեկնածուներին
Քաղաքականություն
17.07.2024 | 19:21
Այսօր տեղի է ունեցել Ադրբեջանի նախագահ Իլհամ Ալիևի ղեկավարած իշխող «Նոր Ադրբեջան» կուսակցության վարչության նիստը։ Ադրբեջանական լրատվամիջոցների փոխանցմամբ՝ հանդիպման ժամանակ կուսակցությունը որոշել է Միլլի Մեջլիսի պատգամավորների թեկնածուներին 2024 թվականի սեպտեմբերի 1-ին կայանալիք արտահերթ ընտրությունների համար։
Քաղաքական ուժը պատգամավորության թեկնածուներ է առաջադրելու բոլոր 125 ընտրատարածքներում։
Թեկնածուների ցուցակում են փոխվարչապետ Ալի Ահմեդովը, Կրոնական կազմակերպությունների հետ աշխատանքի պետական կոմիտեի նախկին նախագահ Մուբարիզ Գուրբանլին և հանձնաժողովի նախկին փոխնախագահ Սայադ Արանը, լրագրողներին ասել է կուսակցության վարչության անդամ Մուսա Գուլիևը։
Նա նշել է, որ Նախիջևանի Գերագույն Մեջլիսի նախկին նախագահ Վասիֆ Թալիբովի, Գիտությունների ազգային ակադեմիայի նախկին նախագահ Իսա Հաբիբբեյլիի և Մեջլիսի նախկին խոսնակ Օքթայ Ասադովի անունները բացակայում են ցուցակից։
Ընտրություններին մասնակցելու են նաև ընդդիմադիր «Մուսավաթ» և «Հանրապետական այլընտրանք» (ReAl) կուսակցությունները։
Հիշեցնենք՝ հունիսի 28-ին Ադրբեջանի նախագահ Իլհամ Ալիևը հրամանագիր էր ստորագրել երկրի վեցերորդ գումարման Միլլի Մեջլիսը ցրելու և արտահերթ ընտրություններ նշանակելու մասին։ Ալիևը խորհրդարանի արտահերթ ընտրությունները նշանակել է 2024 թվականի սեպտեմբերի 1-ին։ Երկրի Սահմանադրական դատարանի պլենումն ավելի վաղ քննարկել էր Ալիևի դիմումը Միլլի Մեջլիսը ցրելու և արտահերթ ընտրություններ նշանակելու վերաբերյալ՝ որոշելով, որ այն համապատասխանում է Սահմանադրությանը։
