Ուկրաինացիների գրեթե կեսը կողմ է ՌԴ-ի հետ բանակցություններ սկսելուն. հարցում

Ուկրաինացիների 44 տոկոսը կարծում է, որ եկել է Ռուսաստանի հետ խաղաղության բանակցություններ սկսելու ժամանակը, իսկ դրան դեմ է արտահայտվել հարցվածների 35 տոկոսը, դժվարացել է պատասխանել՝ 21 տոկոսը։ Այսպիսին են Ռազումկովի կենտրոնի հետազոտության արդյունքները, որոնք անցկացվել են ուկրաինական ZN.UA-ի պատվերով, գրում է DW-ի ռուսական ծառայությունը։

Ըստ հարցման՝ երկրի կենտրոնի բնակիչների 49 տոկոսը հանգիստ կընդունի Ռուսաստանի Դաշնության հետ պաշտոնական խաղաղ բանակցությունների մեկնարկի մասին տեղեկությունը։ Ուկրաինայի արևմտյան հատվածում այս ցուցանիշը զգալիորեն ցածր է՝ ընդամենը 35 տոկոս։ Երկրի արևելքում, իր հերթին, հարցվածների միայն 33 տոկոսն է ցանկանում բանակցություններ վարել ՌԴ-ի հետ, իսկ 34 տոկոսը դեմ է։ Հարցվածների գրեթե մեկ երրորդը չի կողմնորոշվել:

Հարցին՝ արժե՞, արդյոք, չեղարկել նախագահ Վլադիմիր Զելենսկիի՝ 2022 թվականի հոկտեմբերին ՌԴ նախագահ Պուտինի հետ բանակցություններ վարելու անհնարինության մասին հրամանագիրը, հարցման մասնակիցների 32 տոկոսը դրական է պատասխանել, իսկ 37 տոկոսը կարծում է, որ այս հրամանագիրը կարող է ուժի մեջ մնալ։

Միևնույն ժամանակ, ուկրաինացիների ճնշող մեծամասնությունը կարծում է, որ երկիրը չպետք է համաձայնի Վլադիմիր Պուտինի առաջարկած «խաղաղության» պայմաններին։ Այսպես, հարցվածների 83 տոկոսը նշել է, որ չի համաձայնի Դոնեցկի, Լուգանսկի, Խերսոնի և Զապորոժիեի շրջաններից ուկրաինական զորքերի դուրսբերմանը։ Հարցվածների 77 տոկոսը դեմ է արտահայտվել Ռուսաստանի դեմ բոլոր միջազգային պատժամիջոցների վերացմանը՝ նրա սկսած պատերազմի համար։

Հարցման մասնակիցների 51,5 տոկոսը համար Ռուսաստանի հետ խաղաղության հասնելու նվազագույն պայմանը Ուկրաինայի վերադարձն է 1991թ. սահմաններին։ Հարցվածների 26 տոկոսը կհամաձայնի ռուսական զորքերի դուրսբերմանը 2022 թվականի սկզբին զբաղեցրած դիրքերից։

Չնայած Վլադիմիր Պուտինի առաջարկի հետ անհամաձայնությանը՝ ուկրաինացիների մեծամասնությունը՝ 76 տոկոսը, վստահ է, որ ՌԴ նախագահը խաղաղություն է ցանկանում միայն իր պայմաններով։ 47 տոկոսն էլ  կարծում է, որ Պուտինը «պատրաստ է սակարկել», քանի որ պատերազմը չափազանց թանկ է նստում Ռուսաստանի  տնտեսության վրա։