Քաղաքականություն
05.07.2024 | 18:42
Ազգային ժողովի խոսնակ Ալեն Սիմոնյանն այսօր Factor TV-ի հարցին ի պատասխան հույս հայտնեց՝ Հայաստանը Ռուսաստանում շուտով նոր դեսպան կունենա, թեկնածությունն արդեն ներկայացված է, սպասում են նշանակմանը։ Մենք հարց էինք ուղղել Սիմոնյանին՝ արդյո՞ք հնարավոր է, որ Վաղարշակ Հարությունյանը հետ կանչվի ՌԴ-ից՝ հաշվի առնելով նրա վերջին հայտարարություններն ու այցերը, և արդյո՞ք դեսպանի հայտարարությունները համաձայնեցվում են ՀՀ ԱԳՆ-ի հետ։
ՀՀ ԱԳՆ խոսնակ Անի Բադալյանը Factor TV-ի հարցին ի պատասխան ասաց, որ այս պահին թեմայի վերաբերյալ հավելյալ մեկնաբանություն չունեն։
«Ինչպես գիտեք դեսպանների հետ կանչը կամ նշանակումը գործընթաց է, որի վերջնարդյունքի մասին պաշտոնապես հանրային իրազեկումն ապահովում ենք ՀՀ նախագահի համապատասխան հրամանագրի հրապարակման ժամանակ»,- ասաց արտգործնախարարության խոսնակը։
Մինչ այս պահը խոսվում էր խորհրդարանի իշխանական պատգամավոր Գուրգեն Արսենյանի թեկնածության մասին։ Դեռ 2023-ի հոկտեմբերին Արսենյանը հաստատել էր, որ իր թեկնածությունն է ներկայացվել Ռուսաստանում Հայաստանի դեսպանի պաշտոնի համար․ «Իմ փաստաթղթերը գտնվում են Ռուսաստանում»,- ասել էր Արսենյանը։ Տեղեկություններ էին տարածվել անգամ, որ Ռուսաստանը մերժել է Արսենյանի ագրեմանները, սակայն պատգամավորը հերքել էր։
Ռուսաստանի փոխարտգործնախարար Միխայիլ Գալուզինն այսօր, պատասխանելով Ռուսաստանում Հայաստանի դեսպանի փոփոխության մասին լրագրողների հարցին, ասել է․ «Պետության իրավասությունն է՝ որոշել դեսպանի թեկնածությունը այս կամ այն երկրում։ Այս դեպքում մենք խոսում ենք Ռուսաստանի Դաշնությունում դեսպանին փոխարինելու՝ Հայաստանի ղեկավարության մտադրության մասին»։
Ռուս պաշտոնյան նաև ընդգծել է, որ «Ռուսաստանը գոհ է Մոսկվայում Հայաստանի դեսպան Վաղարշակ Հարությունյանի աշխատանքից»։
Արփի Հակոբյան
