22.11.2024 | 14:15
Եղանակը կցրտի․ առաջիկա օրերին բարձրադիր շրջաններում ձյուն է սպասվում
ՀՀ կառավարության գործունեությունը ոչ ամբողջովին է համապատասխանում մարդկանց թրաֆիքինգի վերացման նվազագույն չափանիշներին․ Պետքարտուղարության զեկույցը
Քաղաքականություն
26.06.2024 | 14:35
Հայաստանի կառավարության գործունեությունը ոչ ամբողջովին է համապատասխանում մարդկանց թրաֆիքինգի վերացման նվազագույն չափանիշներին, սակայն զգալի ջանքեր է գործադրում այդ ուղղությամբ։ Այս մասին ասվում է ԱՄՆ Պետքարտուղարության Մարդկանց թրաֆիքինգի (TIP) վերաբերյալ 2024 թվականի զեկույցում։
Նշվում է, որ կառավարությունը նախորդ հաշվետու ժամանակաշրջանի համեմատ ցույց է տվել ջանքերի ընդհանուր աճ, ուստի՝ Հայաստանը մնացել է երկրորդ մակարդակում: Այս ջանքերը ներառում են ավելի շատ ենթադրյալ թրաֆիքինգի դեպքերի հետաքննություններ և քրեական հետապնդում, ավելի շատ զոհերի նույնականացում: Կառավարությունը մեծացրել է ռեսուրսները տուժածներին պաշտպանելու համար, ներառյալ՝ ՀԿ-ների կողմից ղեկավարվող ապաստարանը:
Աշխատանքի և սոցիալական հարցերի նախարարությունը հրապարակել է սոցիալական աշխատողների համար զոհերի նույնականացման ուղեցույցներ և մշակել է գրքույկներ՝ տուժածներին տեղեկացնելու պետական առկա ռեսուրսների մասին: Կառավարությունն ավելացրել է ռեսուրսները կանխարգելման ջանքերի համար։
Ըստ զեկույցի, սակայն, ՀՀ կառավարությունը չի կարողացել պահպանել նվազագույն չափանիշները մի քանի հիմնական ոլորտներում: Մասնավորապես, ասվում է, որ դատախազները կարճել կամ վերադասակարգել են գործերը՝ ապացույցների բացակայության կամ տուժողների ցուցմունքներին մեծ վստահության պատճառով՝ առանց հաստատող ապացույցների:
«Իրավապահ ոլորտի պաշտոնյաները քրեական դատավարության ժամանակ միշտ չէ, որ ցուցաբերել են զոհակենտրոն մոտեցում, և կառավարությունը չի իրականացրել զոհակենտրոն քաղաքականություն և տուժող-վկաների աջակցության միջոց: Կառավարությունը շարունակել է ֆինանսավորել զոհերի աջակցության վերաինտեգրման ծրագրերը, որոնք երբեմն բավարար չեն եղել զոհերի կարիքները լիովին բավարարելու համար»,- ասվում է զեկույցում։
Նշվում է նաև, որ Լեռնային Ղարաբաղից տեղահանված ու փախստական դարձած ավելի քան 100,000 մարդիկ, որոնք գործազուրկ են, խոցելի են մարդկանց թրաֆիքինգի առումով:
