չԾխելու մանիֆեստը․ արգելված է, բայց պարզվում է՝ կարելի է. ՏԵՍԱՆՅՈՒԹ

Թեև արդեն ավելի քան 2 տարի Հայաստանում չի թույլատրվում հանրային սննդի բաց և փակ օբյեկտներում ծխախոտի կամ ծխախոտի փոխարինիչների օգտագործումը, սակայն արգելքը շատ հաճախ չի գործում։ Factor TV-ի տեսախցիկն ընդամենը մի քանի րոպեում հանրային սննդի որոշ օբյեկտներում արձանագրել է, որ այցելուները ծխում են ծխախոտ, նարգիլե, էլեկտրոնային սիգարետ, անգամ ծխամորճ, և այդ ամենը՝ հենց արգելող ցուցանակի դիմաց նստած։

Այս խախտման համար այցելուն պետք է տուգանվի 50 հազար դրամի չափով, իսկ օբյեկտի սեփականատերը՝ 150-200 հազար դրամի չափով։ Առողջապահության ու աշխատանքի տեսչական մարմինը պատասխանատու է հանրային սննդի օբյեկտներում ծխախոտն արգելող նշանների տեղադրման համար, իսկ վերահսկողությունն իրականացնում է Ներքին գործերի նախարարությունը։

ԱԺ «Քաղաքացիական պայմանագիր» խմբակցության պատգամավոր Արսեն Թորոսյանի կարծիքով՝ ՆԳՆ-ն պետք է ուժեղացնի վարչարարությունը և ստիպի տնտեսվարողներին դադարել ծխախոտային արտադրատեսակներ մատուցել իրենց հանրային սննդի օբյեկտներում։ Պատգամավորը ֆեյսբուքյան գրառմամբ ահազանգել էր մայրաքաղաքում նորաբաց սիգարի փակ ակումբի գործունեության մասին՝ Ներքին գործերի նախարարությունից համապատասխան արձագանք ակնկալելով։

Factor TV-ն կապ հաստատեց ակումբի հիմնադրի հետ, որը մեզ հետ զրույցում պնդեց, որ այն փակ ակումբ է և հանրային չի համարվում։ Ակումբի հիմնադիրը հայտարարում է, թե ակումբի ներսում միայն սիգար է լինելու, որը, նրա պնդմամբ, ծխախոտ չի համարվում։

«Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքի 6-րդ հոդվածը սահմանում է․ հանրային սննդի օբյեկտներում, այդ թվում՝ բացօթյա (ճաշարաններ, ռեստորաններ, սրճարաններ, բարեր, բուֆետներ և խոհարարական արտադրանքի պատրաստման և իրացման այլ օբյեկտներ), արգելվում է ծխախոտային արտադրատեսակների, ծխախոտային արտադրատեսակների փոխարինիչների (բացառությամբ՝ բժշկական նպատակով օգտագործվող ծխախոտային արտադրատեսակների փոխարինիչների) օգտագործումը:

Ծխելու հետևանքով առաջացած հիվանդություններից Հայաստանում տարեկան գրանցվում է մոտ 5,500 մահվան դեպք։ Այս մասին նշված է ՄԱԿ-ի, ՀՀ Առողջապահության նախարարության և միջազգային մի շարք կազմակերպությունների համատեղ զեկույցում։ Ծխախոտի օգտագործմամբ պայմանավորված հիվանդությունները Հայաստանի տնտեսության համար ամեն տարի առաջացնում են ավելի քան 273 միլիարդ դրամի ծախսային բեռ։ Ըստ նույն հետազոտության՝ Հայաստանում 18-ից մինչ 69 տարեկան բնակչության ավելի քան մեկ քառորդը՝ 28 տոկոսը ծխախոտի որևէ տեսակ է օգտագործում:

Մանրամասները՝ տեսանյութում։

Անի Թամրազյան