24.06.2026 | 07:58
ԱԱ-2026. Կոլումբիան հաղթեց ու նվաճեց փլեյ-օֆֆի ուղեգիր. ՏԵՍԱՆՅՈՒԹ
Ադրբեջանն Ուկրաինային 40 մլն դոլարի օգնություն է ցուցաբերել
Քաղաքականություն
12.06.2024 | 14:43
Ադրբեջանը հանդես է գալիս Ուկրաինայում ռազմական գործողությունների շուտափույթ դադարեցման, ինչպես նաև միջազգային իրավունքի հիման վրա հակամարտության դիվանագիտական լուծման օգտին: Այս մասին Գերմանիայում Ուկրաինայի վերականգնմանը նվիրված համաժողովում հայտարարել է Ադրբեջանի ԱԳ նախարար Ջեյհուն Բայրամովը՝ հաստատելով Բաքվի աջակցությունն Ուկրաինայի ինքնիշխանությանն ու տարածքային ամբողջականությանը, գրում են ադրբեջանական լրատվամիջոցները։
Նա ընդգծել է, որ Ադրբեջանն առաջին պետություններից է, որը հումանիտար օգնություն է ցուցաբերել Ուկրաինային։ Բայրամովը հայտարարել է, որ, ընդհանուր առմամբ, Բաքուն Կիևին 40 մլն դոլարի չափով օգնություն է տրամադրել։
Բաքուն իրականացնում է ուկրաինական հակամարտությունից տուժած երեխաների բժշկական և սոցիալ-հոգեբանական վերականգնողական ծրագիր, աջակցում է Ուկրաինայում ենթակառուցվածքների վերականգնման ծրագրերին, մասնավորապես, Իրպենում արդեն ավարտվել է դպրոցի շենքի վերակառուցումը։
Համաժողովի շրջանակում Բայրամովը հանդիպել է նաև Ուկրաինայի ԱԳ նախարար Դմիտրի Կուլեբայի հետ։ Քննարկվել են ադրբեջանա-ուկրաինական համագործակցության օրակարգային ընթացիկ հարցեր, ինչպես նաև տարածաշրջանում տիրող իրավիճակը։
Բայրամովն իր ուկրաինացի գործընկերոջը տեղեկացրել է տարածաշրջանում վերջին իրավիճակի, Հայաստան-Ադրբեջան հարաբերությունների կարգավորման ուղղությամբ ձեռնարկվող քայլերի, ինչպես նաև դրանում առկա խոչընդոտների մասին։
Ուկրաինական կողմը շնորհակալություն է հայտնել ցուցաբերվող մարդասիրական օգնության և վերականգնողական աշխատանքների համար։
Էմմա Չոբանյան
