07.10.2026 | 23:48
Արթուր Դանիելյանը կալանավորվեց
Կյանքի դժվարին իրավիճակում հայտնված 152 երեխայի խնամքը կազմակերպվում է խնամատար ընտանիքներում. ԱՍՀ նախարար
01.06.2024 | 13:39
ԱՍՀ նախարար Նարեկ Մկրտչյանը շնորհավորական ուղերձ է հղել Երեխաների պաշտպանության օրվա առթիվ։
«Սիրելի՛ երեխաներ,
ջերմորեն շնորհավորում եմ Ձեր իրավունքների միջազգային օրվա առթիվ։
Անհոգ, խաղաղ ու երջանիկ ապագա․ այն՝ ինչին ուղղված է մեր ամենօրյա աշխատանքը։
Ընտանիքների հզորացումը, երկրում ժողովրդագրական իրավիճակի բարելավումն ու ծնելիության խրախուսումը մեր երկրի ռազմավարական և առանցքային կետերից մեկն է։ Եվ այս գործում կարևոր է նաև վստահությունը՝ երեխաների բացառիկ ներուժի, սեփական անձի կարևորության գիտակցման ու անսահման հնարավորությունների նկատմամբ։
Երեխաների իրավունքների պաշտպանության ոլորտում իրականացվող բարեփոխումները հիմնված են երեխայակենտրոն մոտեցումների և նրանց լավագույն շահի ապահովման սկզբունքի վրա։ Լայնածավալ օրենսդրական փոփոխությունները ևս միտված են վերանայելու երեխաների իրավունքների պաշտպանության համակարգը՝ ստեղծելով գործուն մեխանիզմներ։
Նույն գերակայությունները սահմանված են նաև Երեխաների իրավունքների պաշտպանության 2024-2029 թվականների համալիր ծրագրում, որի մշակման գործընթացում ընդգրկվում են նաև երեխաները՝ ապահովելով իրենց լսված լինելու իրավունքը։
Երեխաներին և նրանց ընտանիքներին աջակցելու նպատակով՝ Աշխատանքի և սոցիալական հարցերի նախարարության կողմից տրամադրվում են խնամքի ցերեկային ծառայություններ տրամադրումը կյանքի դժվարին իրավիճակում հայտնված երեխաներին, որոնց շրջանակում սոցիալական, հոգեբանական և այլ ծառայություններ են մատուցվում շուրջ 4200, այդ թվում՝ Լեռնային Ղարաբաղից բռնի տեղահանված երեխաների։
Երեխաների բաժանումը կենսաբանական ընտանիքներից կանխելու նպատակով՝ նախարարության ենթակայությամբ գործող 3 ճգնաժամային կենտրոններում կազմակերպվում է նրանց շուրջօրյա ժամանակավոր խնամքը՝ խթանելով ընտանիքների հետ վերամիավորումը։
Պետությունը շարունակում է անհրաժեշտ ջանքեր գործադրել նաև խնամատարության ինստիտուտի զարգացման ուղղությամբ։ Ներկայում կյանքի դժվարին իրավիճակում հայտնված 152 երեխայի խնամքը կազմակերպվում է խնամատար ընտանիքներում՝ կանխելով վերջիններիս հաստատությունում հայտնվելու ռիսկը։
Սիրելի՛ փոքրիկներ,
մեկ անգամ ևս շնորհավորելով տոնի առթիվ՝ մաղթում եմ, որ ձեզանից յուրաքանչյուրը մեծանա սիրո, ջերմության և հոգատարության մթնոլորտում»,- ասված է ուղերձում։
