Քաղաքականություն
21.05.2024 | 16:54
ԵՄ դիվանագիտության ղեկավար Ժոզեպ Բորելն ի գիտություն է ընդունում Միջազգային քրեական դատարանի (ՄՔԴ) դատախազի պահանջը Իսրայելի վարչապետ Բենիամին Նեթանյահուի, պաշտպանության նախարար Յոավ Գալանտի, ինչպես նաև ՀԱՄԱՍ-ի երեք առաջնորդների ձերբակալության օրդեր տրամադրելու վերաբերյալ։ ՄՔԴ անդամ բոլոր երկրները պարտավոր են կատարել դատարանի որոշումները, հիշեցրել է նա։
«Ես ի գիտություն եմ ընդունում ՄՔԴ դատախազի՝ Յահյա Սինվարի, Մուհամմեդ ալ-Դեյֆի, Իսմայիլ Հանիեի, Բենիամին Նեթանյահուի և Յոավ Գալանտի նկատմամբ Միջազգային քրեական դատարանի նախաքննության պալատում ձերբակալության օրդեր ստանալու մասին պահանջը: Բոլոր պետությունները, որոնք վավերացրել են ՄՔԴ-ի կանոնադրությունը, պարտավոր են կատարել դատարանի որոշումները»,- գրել է Բորելը X-ում:
ԵՄ դիվանագիտության ղեկավարի խոսքով՝ «ՄՔԴ-ի մանդատը՝ որպես անկախ միջազգային կառույց, միջազգային իրավունքի հիման վրա ամենածանր հանցագործությունների հետապնդումն է»։
Մայիսի 20-ին ՄՔԴ-ի դատախազ Քարիմ Խանը Նախաքննական պալատին խնդրել է Նեթանյահուի և Գալանտի ձերբակալության օրդեր տրամադրել: Նրա խոսքով՝ դատախազությունը հավաքել է ապացույցներ, որոնք ենթադրում են, որ Իսրայելի վարչապետն ու պաշտպանության նախարարը «պատասխանատու են Պաղեստինի տարածքում (Գազայի հատվածում) առնվազն 2023 թվականի հոկտեմբերի 8-ից սկսած ռազմական հանցագործությունների և մարդկության դեմ հանցագործությունների համար։ Միաժամանակ, դատախազը պահանջել է ՀԱՄԱՍ-ի երեք առաջնորդների ձերբակալության օրդեր տրամադրել։
