ԶԼՄ-ների ազատության իրավիճակն Ադրբեջանում մտահոգիչ է․ Բաքվում ԵՄ դեսպան

Եվրամիությունն Ադրբեջանի ուժեղ գործընկերն է, և խոսքի, լրատվամիջոցների ու տեղեկատվության ազատության հարցերն այդ հարաբերությունների մաս են կազմում: Այս մասին հայտարարել է Ադրբեջանում ԵՄ առաքելության ղեկավար, դեսպան Պյոտր Միխալկոն մայիսի 3-ին նշվող Մամուլի ազատության համաշխարհային օրվա կապակցությամբ լրագրողների հետ հանդիպմանը։

Նա ասել է, որ  խոսքի և լրատվամիջոցների ազատությունը «ժողովրդավարական չափանիշների և համակարգերի հիմնական տարրն է», և Մամուլի ազատության համաշխարհային օրվան ընդառաջ ԵՄ-ն ընդգծում է դա։

Միխալկոն ափսոսանքով նշել է, որ լրագրությունն աշխարհում գնալով դառնում է ավելի վտանգավոր մասնագիտություն, միայն անցյալ տարի աշխարհում սպանվել է 100 լրագրող։ Պատասխանելով Թուրան գործակալության հարցին, թե ԵՄ-ն ի՞նչ ներդրում կարող է ունենալ ԶԼՄ-ների ազատության ապահովման գործում, նա նշել է, որ այդ հարցերն առաջնահերթություն են կողմերի միջև երկխոսության ընթացքում։

«ԶԼՄ-ների ազատությունը մեր առաջնահերթություններից է։ Այդ հարցը միշտ գտնվում է օրակարգում և իրավիճակն Ադրբեջանում մտահոգիչ է։ Մենք դրան ուշադրություն ենք դարձնում մեր երկխոսության մեջ»,- ասել է ԵՄ դեսպանը՝ ափսոսանք հայտնելով լրագրողների վերջին ձերբակալությունների կապակցությամբ։

Միխալկոն նշել է նաև միջազգային կազմակերպությունների, այդ թվում՝ «ԶԼՄ-ների մասին» օրենքի հետ կապված առաջարկությունների կատարման կարևորությունը։

Հիշեցնենք, որ վերջին ամիսների ընթացքում Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող շուրջ երկու տասնյակ լրագրողներ, ընդդիմադիր գործիչներ և քաղաքական ակտիվիստներ։ Խուզարկություններ են իրականացվել Abzas Media-ի, Toplum TV-ի գրասենյակներում և որոշ լրագրողների բնակարաններում։

Միջազգային կառույցները կոչ են անում Ադրբեջանի իշխանություններին դադարեցնել բռնաճնշումներն ու բոլորին ազատ արձակել։ Ապրիլի 25-ին էլ Եվրախոհրդարանը բանաձև էր ընդունել՝ կոչ անելով Ադրբեջանի իշխանություններին ազատ արձակել բոլոր քաղբանտարկյալներին։

Էմմա Չոբանյան