14.10.2026 | 17:10
Factor TV-ն ստացել է Free Media Award 2026 միջազգային մրցանակը
ՊԵԿ պարզաբանումը Մարաթուկ ընկերությունում խուզարկության վերաբերյալ
Տնտեսություն
24.08.2018 | 12:45
«Մարաթուկ» տուրիստական ընկերությունում դատարանի որոշման հիման վրա ՊԵԿ աշխատակիցների կողմից խուզարկություն է իրականացվել:
Այս մասին տեղեկանում ենք ՊԵԿ–ի տարածած մամուլի հաղորդագրությունից, որի մեջ հերքվում է մամուլում տեղ գտած հետևյալ վերտառությունը. ««Զենքով-զրահով գործակալություն են ներխուժել ՊԵԿ քննչական կոմիտեի աշխատակիցները»»։
ՊԵԿ տարածած մամուլի հաղորդագրության մեջ, մասնավորապես, ասված է.
«Հարուցված քրեական գործի շրջանակում ընկերություն նախապես խուզարկության է գնացել 6 աշխատակից՝ հետաքննիչներ և օպերատիվ հետախուզության վարչության ներկայացուցիչներ: Նրանք ներս են մտել, սահմանված կարգի համաձայն ներկայացել և հետաքրքրվել են, թե որտեղ է գտնվում ընկերության տնօրենը:
ՊԵԿ աշխատակիցները տնօրենին ներկայացրել են խուզարկություն իրականացնելու դատարանի որոշման օրինակը: «Մարաթուկի» ղեկավարը, սակայն, դրսևորել է ոչ պատշաճ վարքագիծ՝ հայտարարելով, որ չի թողնի խուզարկություն իրականացնել ընկերությունում:
Միաժամանակ նա սպառնալիքներ է հնչեցրել ՊԵԿ աշխատակիցների նկատմամբ և հայտարարել, որ կհրավիրի ԶԼՄ ներկայացուցիչների՝ փորձելով այդ կերպ խոչընդոտել դատարանի որոշմամբ իրականացվելիք օրինական գործողությունները:
ՊԵԿ աշխատակիցները, տեսնելով, որ հնարավոր չէ հանդարտեցնել վրդովված տնօրենին, և իրավիճակն ավելի է լարվում, հետագա բարդությունները կանխելու նպատակով հրավիրել են ՊԵԿ հատուկ ստորաբաժանման աշխատակիցների, որոնք, բնականաբար, զինված չեն եղել: Սակայն վերջիններիս կողմից որևէ գործողություն չի կատարվել, քանի որ իրավիճակը հնարավոր է եղել կարգավորել»:
