16.12.2025 | 16:30
Փոշի, կեղտ, չկառուցված․ Խաչատուր Սուքիասյանը՝ Կենտրոնի մասին․ ՏԵՍԱՆՅՈՒԹ
«Լիդիան»-ում աշխատող 200 կանանց անունից բաց նամակ է հղվել ՄԻՊ-ին ու ոստիկանապետին
20.08.2018 | 17:51
Ամուլսարի հարակից համայնքների մոտ 200 կանանց անունից բաց նամակ է հղվել ՀՀ Մարդու իրավունքների պաշտպանին, ոստիկանությունը եւ կանանց իրավունքների պաշտպանության հասարակական կազմակերպություններին:
Ինչպես հաղորդում է «Արմենպրես»-ը, նամակում նշված է, որ Ամուլսարի ծրագիրը հարակից համայնքներում բազմաթիվ կանանց համար ոչ միայն արժանապատիվ աշխատանքի, այլեւ սահմանափակ հնարավորություններով գյուղական համայնքներում նոր մասնագիտություն սովորելու, նոր կյանք սկսելու, ընտանիքների սոցիալ-տնտեսական վիճակը բարելավելու, շատերի համար՝ փոքր բիզնես նախաձեռնելու եւ եղածը ընդլայնելու հնարավորություն է:
«Մեզանից շատերը «Լիդիան»-ում աշխատելու ընթացքում ձեռք ենք բերել նոր հմտություններ, շատերը ստացել են նոր մասնագիտություն, վերաորակավորում: «Լիդիանը» Հայաստանում այն բացառիկ կազմակերպություններից է, որ խթանում է կանանց եւ տղամարդկանց համար հավասար հնարավորություններ, աշխատանքային հավասար պայմաններ, եւ մենք հպարտ ենք, որ ունենք արժանապատիվ աշխատանքի եւ զարգացման հնարավորություն:
Վերջին երկու տարում ընկերությունն աջակցել է ավելի քան 50 փոքր բիզնեսի, որոնցից մեծ մասը վարում են կանայք: Մենք անցել ենք բիզնես դասընթացներ, ստացել աջակցություն, վարել մեր բիզնեսները՝ սատարելով մեր ընտանիքներին եւ նրանց բարեկեցությանը»,- ասված է նամակում:
Նամակի տակ ստորագրած կանայք նշում են, որ աշխատելով «Լիդիան»-ում՝ բոլորից լավ են պատկերացնում, թե ինչ բարձր բնապահպանական չափանիշներ են կիրառվում Ամուլսարում: «Թող որեւէ մեկը չասի, որ մեզանից շատ է սիրում իր համայնքը, իր ընտանիքն ու երեխաներին: Համայնքի հանդեպ սերը առաջին հերթին ամենօրյա ազնիվ աշխատանքն է: Մենք բոլորից շատ ենք շահագրգրռված մեր ընտանիքների բարեկեցությամբ եւ բնապահպանությամբ»:
