05.08.2026 | 22:58
Վրաստանում կրկին զանգվածային հոսանքազրկում է տեղի ունեցել
Դուք եք կյանքի սկիզբը․ Ալեն Սիմոնյանի շնորհավորական ուղերձը
Հասարակություն
08.03.2024 | 15:43
ԱԺ նախագահ Ալեն Սիմոնյանը շնորհավորական ուղերձ է հղել Կանանց միջազգային օրվա կապակցությամբ։
Ուղերձում ասվում է․
«Սիրելի՛ կանայք,
Սրտանց շնորհավորում եմ յուրաքանչյուրիդ այս գեղեցիկ տոնի՝ Կանանց միջազգային օրվա առթիվ: Դուք եք կյանքի սկիզբը եւ ձեր նուրբ ու քնքուշ տեսակով դարձնում եք աշխարհն այնպիսին, ինչպիսին կա:
Սիրելի՛ մայրեր, առանց ձեզ չէր լինի ոչինչ: Շնորհակալ ենք, որ անասելի նվիրումով, հոգատարությամբ եւ ծով համբերությամբ, հաճախ զրկանքներով, պարգեւել եք կյանք ու կերտել ճակատագրեր:
Հարգանք եւ խոնարհում հայրենիքի համար իրենց կյանքը տված մեր զինվորների մայրերին, որոնք ծնել եւ դաստիարակել են հերոսներ:
Ուժեղ կանանց մասին կարելի է խոսել անվերջ: Պատմականորեն բազմիցս ապացուցվել է, թե որքան մեծ դերակատարում ունեն կանայք բոլոր ոլորտներում:
Սիրելի՛ կանայք եւ աղջիկներ,
Եղե՛ք այնպիսին, ինչպիսին կաք. նրբության մեջ՝ ուժեղ, համեստության մեջ՝ խիզախ, պարզության մեջ՝ իմաստուն եւ շարունակե՛ք ձեր գոյությամբ լցնել աշխարհը սիրով: Սիրե՛ք եւ գնահատե՛ք ձեզ եւ հավատացած եղեք, որ դուք կարող եք հասնել բոլոր հնարավոր եւ թվացյալ անհնարին հաջողություններին՝ լինել լավ մայր, քույր, կին, գործարար կամ բոլորը միասին:
Թո՛ղ ձեր ուժն ու հմայքը ջերմացնեն մեզ միշտ:
Շնորհավո՛ր ձեր տոնը»:
