Ժամանակն է, որ Հայաստանը կողմնորոշվի ՀԱՊԿ-ում իր կարգավիճակի հարցում․ Սերգեյ Լավրով

Ռուսաստանը հույս ունի Հայաստանից պատասխան ստանալ պարտավորությունների կատարման և համատեղ ինտեգրացիոն կառույցներում, այդ թվում ՝ Հավաքական անվտանգության պայմանագրի կազմակերպությունում (ՀԱՊԿ) մասնակցության վերաբերյալ: TASS-ի փոխանցմամբ՝ այս մասին հայտարարել է Ռուսաստանի արտգործնախարար Սերգեյ Լավրովը Անթալիայի դիվանագիտական ֆորումի արդյունքներով մամուլի ասուլիսի ժամանակ։

«Մենք շատ կցանկանայինք, որ մեր հայ գործընկերներն իրենց համար կողմնորոշվեին, թե ինչպես են նրանք ցանկանում հետագայում ապրել և ինչպես են ցանկանում փոխադարձ հիմունքներով կատարել այն պայմանավորվածությունները, որոնք մեզ կապում են ամենատարբեր ինտեգրացիոն կառույցներում (ներառյալ ՀԱՊԿ-ը)», – ասել է նա:

Հիշեցնենք՝ ՀՀ վարչապետ Նիկոլ Փաշինյանը France 24-ին տված հարցազրույցում հայտարարել էր, որ ՀԱՊԿ-ն իր պատկանությունները ՀՀ-ի նկատմամբ չի կատարել։ «Գիտեք՝ Հավաքական անվտանգության պայմանագրի կազմակերպությունը, մեր գնահատմամբ, չի կատարել անվտանգային ոլորտի իր պարտավորությունները Հայաստանի Հանրապետության նկատմամբ: Մասնավորապես, 2021 թվականին, 2022 թվականին, և դա էլ չէր կարող մեզ համար անցնել առանց հետևանքների: Եվ հետևանքը գործնականում այն է, որ, ըստ էության, սառեցրել ենք մեր մասնակցությունը Հավաքական անվտանգության պայմանագրի կազմակերպությունում: Վաղը ի՞նչ կլինի՝ վաղը կերևա»,- ասել էր Նիկոլ Փաշինյանը։

Վարչապետը ավելի ուշ ԱԺ-կառավարություն հարցուպատասխանի ժամանակ հայտարարել էր նաև՝  «ՀԱՊԿ-ից դե յուրե էլ դուրս կգանք, եթե այս գործընթացը շարունակվի»։