Դատարանը Թրամփին արգելել է մասնակցել Իլինոյսում փրայմերիզին

ԱՄՆ Իլինոյս նահանգի դատարանը նախկին նախագահ Դոնալդ Թրամփին արգելել է մասնակցել մարտի 19-ին նախանշված հանրապետականների նախնական ընտրություններին՝ այդ նահանգից նախագահի թեկնածու առաջադրվելու համար։ Դատավոր Թրեյսի Փորթերը վճիռ է կայացրել՝ վկայակոչելով ԱՄՆ Սահմանադրության 14-րդ ուղղումը, որն արգելում է պաշտոնյաներին պետական ​​պաշտոններ զբաղեցնել, եթե նրանք մասնակցել են ապստամբությանը:

Նախկին նախագահի դեմ հայցը ներկայացրել է Free Speech For People-ի փաստաբանական խումբը, գրում է DW-ի ռուսական ծառայությունը։

Վճռի իրականացումը ժամանակավորապես հետաձգվել է, որպեսզի Թրամփի փաստաբանները հնարավորություն ունենան բողոքարկել այն Գերագույն դատարան: Նրանք դա պետք է անեն մինչև ուրբաթ՝ մարտի 1-ը։ Թրամփի նախընտրական թիմն արդեն իսկ հակասահմանադրական է անվանել դատարանի որոշումը։

Նախկինում նույն հիմնավորումներով նմանատիպ որոշումներ էին կայացրել Կոլորադո և Մեն նահանգների դատարանները։ Ընդհանուր առմամբ, նախկին նախագահին փրայմերիզին մասնակցությունը թույլ չտալու համար դատական ​​հայցեր են ներկայացվել 16 նահանգներում։ Մեյնի և Կոլորադոյի ներկուսակցական ընտրությունները տեղի կունենան մարտի 5-ին:

Գերագույն դատարանը ներկայում քննարկում է Թրամփի բողոքը Կոլորադոյի փրայմերիզից նրան հեռացնելու դեմ։

Նշենք, որ Կապիտոլիումի գրոհը տեղի է ունեցել 2021 թվականի հունվարի 6-ին։ Թրամփի հարյուրավոր կողմնակիցներ ներխուժել էին շենք, որտեղ պետք է տեղի ունենար Կոնգրեսի նիստը՝ 2020 թվականի նախագահական ընտրությունների արդյունքները հաստատելու համար։ Բախումների արդյունքում զոհվել էր հինգ մարդ, վիրավորվել՝ 140 ոստիկան։

ԱՄՆ Կոնգրեսը Թրամփին մեղադրել է բռնություն հրահրելու մեջ, որը վերջինը հերքում է։