07.10.2026 | 09:30
ՀՀ տարածքում ավտոճանապարհներն անցանելի են
ԿՀՎ աշխատակիցը դատապարտվել է 40 տարվա ազատազրկման՝ Wikileaks-ին տվյալներ փոխանցելու համար
Քաղաքականություն
02.02.2024 | 21:34
ԱՄՆ Կենտրոնական հետախուզական վարչության (ԿՀՎ) նախկին աշխատակիցը դատապարտվել է 40 տարվա ազատազրկման՝ Wikileaks հարթակի հետախուզական գործակալության գաղտնի հաքերային ծրագրերի մասին տեղեկություններ փոխանցելու համար։ Նյու Յորքի դատարանը 35-ամյա Ջոշուա Շուլտեին մեղավոր է ճանաչել լրտեսության, հաքերային հարձակման, դատարանի հանդեպ արհամարհանքի, ՀԴԲ-ին կեղծ ցուցմունքներ տալու և մանկական պոռնոգրաֆիա պահելու մեջ: Ըստ ԱՄՆ իշխանությունների՝ Շուլտեն կատարել է ԱՄՆ պատմության մեջ գաղտնի տվյալների ամենամեծ գողությունը, գրում է DW-ի ռուսական ծառայությունը։
2012-2016 թվականներին տղամարդը ներգրավված է եղել ԿՀՎ-ում աշխատող հաքերների խմբում։ Այդ պահին նա հավաքել է տվյալներ ծրագրերի մասին, որոնք օգտագործվում են հետախուզական ծառայության կողմից կիբերլրտեսության համար և դրանք փոխանցել Wikileaks-ին։ 2017-ին հարթակը հրապարակել է այդ փաստաթղթերը Vault 7 անունով: Դրա շնորհիվ ամբողջ աշխարհում հաքերները հասանելիություն են ստացել ծրագրերին: Դատական փաստաթղթերի համաձայն՝ Շուլտեն գործել է իր նախկին գործընկերների նկատմամբ ատելությունից դրդված։
«Շուլտեն դավաճանել է իր երկրին՝ կատարելով ԱՄՆ պատմության մեջ ամենացինիկ և նողկալի լրտեսական հանցագործություններից մեկը»,- ասվում է դատախազության հայտարարության մեջ:
Ծրագրերի գողությունը և թողարկումը «անմիջապես և լրջորեն խաթարել են» ԱՄՆ-ի՝ հակառակորդների մասին տեղեկություններ հավաքելու ԿՀՎ-ի կարողությունը: ԿՀՎ-ի աշխատակիցներն ու ծրագրերը վտանգի տակ են հայտնվել և տվյալների խախտումը Գաղտնի ծառայությանն արժեցել է «հարյուր միլիոնավոր դոլարներ»:
Էմմա Չոբանյան
