05.04.2026 | 21:21
Բախվել են VAZ և KIA մակնիշների ավտոմեքենաները․ կան տուժածներ և զոհ
Արաբկիրում շուրջ 50 տնտեսվարողի նկատմամբ վարչական վարույթ է հարուցվել ձնամաքրում չկատարելու համար․ ՏԵՍԱՆՅՈՒԹ
Տնտեսություն
29.01.2024 | 17:23
Արաբկիրում շուրջ 50 տնտեսվարողի նկատմամբ վարչական վարույթ է հարուցվել տարածքում ձնամաքրման աշխատանքներ չիրականացնելու համար, 30 տնտեսվարողի նկատմամբ վարչական իրավախախտումների հիմքով արձանագրություններ են կազմվել․ այս մասին լրագրողների հետ զրույցում ասաց Արաբկիր վարչական շրջանի ղեկավարի տեղակալ Գեղամ Կարապետյանը։
«Վարչական վարույթի շրջանակներում տնտեսվարողները հրավիրվում են մեր աշխատակազմ և իրենց իսկ ներկայությամբ կազմվում են արձանագրություններ» ,- նշեց նա։
Գեղամ Կարապետյանի խոսքով՝ դեռևս հոկտեմբեր-նոյեմբեր ամիսներին տնտեսվարողներին սկսել են ծանուցումներ բաժանել իրենց պարտավորությունները իրականացնելու վերաբերյալ։ Ըստ Կարապետյանի՝ մոտ 2500 տնտեսվարողներից 2300-ն արդեն ծանուցված են, 200 տնտեսվարողի հետ տարվում են ծանուցման աշխատանքներ։
«Այստեղ կան տարածքներ, երբ տնտեսվարողները ստացել են ծանուցագիր, սակայն չեն կատարել իրենց պարտականությունները։ Այս պահի դրությամբ արդեն իսկ կազմվում են արձանագրություններ վարչական իրավախախտումների վերաբերյալ օրենսգրքի 186-րդ հոդվածի 2-րդ մասի հատկանիշներով։ Վերջիներս պատասխանատվության կենթարկվեն 10-ից 20 հազար դրամ գումարի չափով»,- նշեց Արաբկիրի վարչական շրջանի ղեկավարի տեղակալը։
Մանրամասները՝ տեսանյութում։
