Թուրքիայում իսրայելցի ֆուտբոլիստի են ձերբակալել խաղի ժամանակ Իսրայելին աջակցության համար

Իսրայելցի ֆուտբոլիստը, որը Թուրքիայում անցկացված խաղի ժամանակ Իսրայել-ՀԱՄԱՍ պատերազմի մասին հաղորդագրություն է ցուցադրել, կալանավորվել է, գրում է The Guardian-ը՝ թուրքական ԶԼՄ-ներին հղումով։

Ավելի վաղ երկրի արդարադատության նախարարը հայտարարել էր ֆուտբոլիստ Սագիվ Յեհեզկելի նկատմամբ հետաքննություն սկսելու մասին՝ «ատելություն հրահրելու» կասկածանքով, այն բանից հետո, երբ նրա ակումբը՝ «Անթալիասպոր»-ը, խզել էր պայմանագիրը այդ խնդրի պատճառով:

«Տրաբսոնսպոր»-ի դեմ խաղում իր թիմի կազմում գոլ խփելուց հետո Յեհեզկելը հաղորդագրություն էր ցուցադրել ձախ դաստակի վիրակապին՝ գրառմամբ. «100 օր. 10.07»։ Սա վերաբերում է հոկտեմբերի 7-ին Իսրայելի վրա ՀԱՄԱՍ-ի հարձակմանը և այն օրերի քանակին, երբ ավելի քան 130 իսրայելցի պատանդներ են պահվել Գազայում:

«Անթալիայի դատախազությունը ​​հետաքննություն է սկսել իսրայելցի ֆուտբոլիստ Սագիվ Յեհեզկելի նկատմամբ՝ Գազայի հատվածում Իսրայելի կողմից իրականացված ջարդի օգտին նողկալի տոնակատարության պատճառով հրապարակայնորեն ատելություն սերմանելու համար»,- առցանց գրառման մեջ ասել է Թուրքիայի արդարադատության նախարար Յըլմազ Թունջը՝ նշելով, որ շարունակելու են կանգնել ճնշված պաղեստինցիների կողքին ու  դատապարտել այն, ինչը նա անվանել է շարունակվող «ցեղասպանություն» Գազայի հատվածում։

«Անթալիասպոր»-ն էլ  հայտնել է, որ հեռացրել է իսրայելցի խաղացողին՝ նրան մեղադրելով «երկրի արժեքների դեմ գործելու համար»:

Հակամարտության սկզբից ի վեր Թուրքիայի նախագահ Ռեջեփ Թայիփ Էրդողանը բազմիցս Իսրայելն անվանել է «ահաբեկչական պետություն»՝ Թել Ավիվին մեղադրելով Գազայում ռազմական հանցագործությունների ու ցեղասպանության իրականացման մեջ։

Էմմա Չոբանյան