23.11.2024 | 11:23
Արտարժույթների փոխարժեքները՝ նոյեմբերի 23-ի դրությամբ
3 մլրդ 500 մլն դրամ վարկ «Ջի Թի Բի Սթիլ» ՍՊԸ-ին՝ Արարատում մետաղաձուլարան կառուցելու համար
Տնտեսություն
11.01.2024 | 11:48
Կառավարությունը կֆինանսավորի «Ջի Թի Բի Սթիլ» սահմանափակ պատասխանատվությամբ ընկերությանը․ հարցն ընդգրկված է կառավարության այսօրվա նիստի օրակարգում։ Նախագծում նշվում է, որ ֆինանսավորումը տրամադրվում է Արարատի մարզի Արարատ համայնքի Արարատ բնակավայրում պողպատի գործարանի կառուցման ներդրումային ծրագիր իրականացնելու նպատակով։
Ըստ այդմ՝ «Հայաստանի Զարգացման և Ներդրումների Կորպորացիա» ունիվերսալ վարկային կազմակերպություն փակ բաժնետիրական ընկերությունը կտրամադրի 3,500,000,000 դրամ բյուջետային վարկ՝ տարեկան 8 տոկոս տոկոսադրույքով, 4 տարի` սկսած 3-րդ տարվանից մարման ժամկետով։
Հիշեցնենք, որ ընկերությունը գործարանի կառուցումը սկսել էր Երասխում, սակայն հակառակորդի դիրքերը մետաղաձուլարանից ընդամենը 400 մետր հեռավորության վրա էին, և տեխնիկայի շարժ նկատելուն պես գործարանն ու աշխատակիցները հայտնվում էին ադրբեջանական ԶՈւ-ի թիրախում։ Ադրբեջանական կողմի կրակահերթերի հետևանքով վիրավորվել էր գործարանի շինարարական աշխատանքներում ներգրավված Հնդկաստանի երկու քաղաքացի: Դրանից հետո Բաքուն շինաշխատանքներն անհապաղ դադարեցնելու կոչ էր արել հայկական կողմին։ Պաշտոնական Երևանը պատասխանել էր՝ շինաշխատանքները դադարեցնելու որևէ հիմք չկա՝ միևնույն ժամանակ պահանջելով Ադրբեջանից դադարեցնել անօրինական ուժի կիրառումը Հայաստանի ինքնիշխան տարածքի վրա։
Արփի Հակոբյան
