Սերբիայում ընտրակեղծիքների դեմ բողոքի ցույցերը շարունակվում են

Սերբիայի մայրաքաղաք Բելգրադում շարունակվում են մեկ շաբաթ առաջ տեղի ունեցած խորհրդարանական և տեղական ընտրություններում ենթադրյալ կեղծիքների դեմ բողոքի ցույցերը, գրում է DW-ի ռուսական ծառայությունը։

Հարյուրավոր մարդիկ, հիմնականում՝ ուսանողներ, հավաքվել են պետական ​​ընտրական հանձնաժողովի շենքի մոտ, այնուհետև երթով շարժվել դեպի մայրաքաղաքի կենտրոնական ոստիկանական բաժանմունք, որտեղ, ենթադրաբար, պահվում են ավելի վաղ ձերբակալված ցուցարարները։

«Սերբիան ընդդեմ բռնության» ընդդիմադիր քաղաքական կոալիցիայի հարյուրավոր կողմնակիցներ էլ փակել են Կնեզ Միլոշի կենտրոնական փողոցը, որտեղ գտնվում են Սերբիայի կառավարության շենքերն ու օտարերկրյա դեսպանատները։ Ականատեսների վկայությամբ՝ ոստիկանների հետ բախումներ չեն եղել, ուսանողները հենց ճանապարհին ֆուտբոլ և վոլեյբոլ են խաղացել։

«Ես ծնվել եմ 2002 թվականին և կարծում էի, որ երբեք ստիպված չեմ լինի իմ ծնողների նման փողոց դուրս գալ՝ ժողովրդավարության համար պայքարելու։ Սակայն ստիպված եմ»,- ասել է ակցիայի մասնակիցներից՝ 21-ամյա ուսանողուի Էմիլի Միլենկովիչը։

Սերբիայի ոստիկանության տվյալներով՝ բողոքի ցույցերի ընթացքում, որոնք արդեն ութերորդ օրն են ընթանում, ձերբակալվել է առնվազն 38 մարդ: Նրանք մեղադրվում են սահմանադրական կարգը բռնի փոխելու և կառավարությունը տապալելու փորձի, ինչպես նաև բռնի գործողությունների մեջ, հայտարարել է Սերբիայի ոստիկանության բաժնի ղեկավար Իվիցա Իվկովիչը։ Նրա խոսքով՝ ութ ոստիկան վիրավորվել է, այդ թվում՝ մի քանիսը՝ ծանր։ Ցուցարարներն իրենց հերթին ոստիկաններին մեղադրում են իրենց նկատմամբ չարդարացված բռնություն գործադրելու մեջ։

Սերբիայի Ալեքսանդր Վուչիչն անկարգություններն անվանել է դրսից հրահրված։

Նշենք, որ կիրակի երեկոյան ցուցարարները փորձել էին ներխուժել Բելգրադի քաղաքային խորհրդարանի շենք։

«Սերբիան ընդդեմ բռնության» ընդդիմադիր դաշինքի կողմնակիցները բողոքի ցույցերը սկսել են երկրում դեկտեմբերի 17-ին կայացած խորհրդարանական ընտրությունների հաջորդ օրը:

Էմմա Չոբանյան